ਲਾਈਵ ਪੰਜਾਬੀ ਟੀਵੀ ਬਿਊਰੋ : ਕੁਝ ਹੀ ਦਿਨਾਂ ਵਿਚ ਨਵਾਂ ਸਾਲ ਸ਼ੁਰੂ ਹੋਣ ਜਾ ਰਿਹਾ ਹੈ। ਨਵਾਂ ਸਾਲ ਲੋਕਾਂ ਦੇ ਜੀਵਨ ਵਿਚ ਨਵੀਂ ਖੁਸ਼ੀ ਅਤੇ ਉਤਸ਼ਾਹ ਲੈ ਕੇ ਆਵੇ। ਨਵੇਂ ਸਾਲ ਯਾਨੀ 2025 ਵਿਚ, ਸੂਰਜ, ਧਰਤੀ ਅਤੇ ਚੰਦਰਮਾ ਦੀ ਗਤੀ ਦੁਨੀਆ ਨੂੰ ਦੋ ਸੂਰਜ ਗ੍ਰਹਿਣ ਅਤੇ ਦੋ ਚੰਦਰ ਗ੍ਰਹਿਣ ਦੇ ਦਿਲਚਸਪ ਦ੍ਰਿਸ਼ ਦਿਖਾਏਗੀ। ਹਾਲਾਂਕਿ, ਉਜੈਨ ਦੀ ਇਕ ਨਾਮਵਰ ਆਬਜ਼ਰਵੇਟਰੀ ਦੀ ਇਹ ਭਵਿੱਖਬਾਣੀ ਭਾਰਤ ਦੇ ਖਗੋਲ ਵਿਗਿਆਨ ਪ੍ਰੇਮੀਆਂ ਨੂੰ ਨਿਰਾਸ਼ ਕਰ ਸਕਦੀ ਹੈ ਕਿ ਦੇਸ਼ ਵਿੱਚ ਇਨ੍ਹਾਂ ਵਿੱਚੋਂ ਸਿਰਫ ਇੱਕ ਗ੍ਰਹਿਣ ਦਿਖਾਈ ਦੇ ਸਕੇਗਾ।

ਚੰਦ ਗ੍ਰਹਿਣ 14 ਮਾਰਚ ਨੂੰ

ਸਰਕਾਰੀ ਜੀਵਾਜੀ ਆਬਜ਼ਰਵੇਟਰੀ ਦੇ ਸੁਪਰਡੈਂਟ ਡਾ: ਰਾਜਿੰਦਰ ਪ੍ਰਕਾਸ਼ ਗੁਪਤਾ ਨੇ ਦੱਸਿਆ ਕਿ ਨਵੇਂ ਸਾਲ ਵਿਚ ਗ੍ਰਹਿਣ ਦਾ ਸਿਲਸਿਲਾ 14 ਮਾਰਚ ਨੂੰ ਪੂਰਨ ਚੰਦ ਗ੍ਰਹਿਣ ਨਾਲ ਸ਼ੁਰੂ ਹੋਵੇਗਾ। ਗੁਪਤਾ ਨੇ ਕਿਹਾ ਕਿ ਨਵੇਂ ਸਾਲ ਦਾ ਇਹ ਪਹਿਲਾ ਗ੍ਰਹਿਣ ਭਾਰਤ ਵਿਚ ਨਹੀਂ ਦੇਖਿਆ ਜਾ ਸਕੇਗਾ, ਕਿਉਂਕਿ ਇਸ ਖਗੋਲੀ ਘਟਨਾ ਦੇ ਸਮੇਂ ਦੇਸ਼ ਵਿਚ ਦਿਨ ਦਾ ਸਮਾਂ ਹੋਵੇਗਾ। ਇਹ ਖਗੋਲੀ ਘਟਨਾ ਅਮਰੀਕਾ, ਪੱਛਮੀ ਯੂਰਪ, ਪੱਛਮੀ ਅਫਰੀਕਾ ਅਤੇ ਉੱਤਰੀ ਅਤੇ ਦੱਖਣੀ ਅਟਲਾਂਟਿਕ ਮਹਾਸਾਗਰ ਵਿਚ ਦਿਖਾਈ ਦੇਵੇਗੀ।

29 ਮਾਰਚ ਨੂੰ ਅੰਸ਼ਕ ਸੂਰਜ ਗ੍ਰਹਿਣ

ਜੀਵਾਜੀ ਆਬਜ਼ਰਵੇਟਰੀ ਦੇ ਸੁਪਰਡੈਂਟ ਡਾ. ਗੁਪਤਾ ਨੇ ਦੱਸਿਆ ਕਿ 29 ਮਾਰਚ ਨੂੰ ਹੋਣ ਵਾਲਾ ਅੰਸ਼ਿਕ ਸੂਰਜ ਗ੍ਰਹਿਣ ਭਾਰਤ ਵਿਚ ਦਿਖਾਈ ਨਹੀਂ ਦੇਵੇਗਾ। ਇਹ ਗ੍ਰਹਿਣ ਉੱਤਰੀ ਅਮਰੀਕਾ, ਗ੍ਰੀਨਲੈਂਡ, ਆਈਸ ਲੈਂਡ, ਉੱਤਰੀ ਅਟਲਾਂਟਿਕ ਮਹਾਸਾਗਰ, ਪੂਰੇ ਯੂਰਪ ਅਤੇ ਉੱਤਰ-ਪੱਛਮੀ ਰੂਸ ਵਿਚ ਦਿਖਾਈ ਦੇਵੇਗਾ।

7 ਤੇ 8 ਸਤੰਬਰ ਦਾ ਚੰਦ ਗ੍ਰਹਿਣ, ਭਾਰਤ ਵਿਚ ਦਿਖਾਈ ਦੇਵੇਗਾ

ਉਨ੍ਹਾਂ ਕਿਹਾ ਕਿ ਭਾਰਤੀ ਖਗੋਲ-ਵਿਗਿਆਨ ਪ੍ਰੇਮੀ ਇਸ ਤੱਥ ਤੋਂ ਉਤਸ਼ਾਹਿਤ ਹੋ ਸਕਦੇ ਹਨ ਕਿ ਸਾਲ 2025 ਵਿਚ ਦੇਸ਼ ਵਿਚ 7 ਤੋਂ 8 ਸਤੰਬਰ ਦੇ ਵਿਚਕਾਰ ਹੋਣ ਵਾਲਾ ਪੂਰਨ ਚੰਦ ਗ੍ਰਹਿਣ ਦੇਖਿਆ ਜਾ ਸਕੇਗਾ। ਇਹ ਗ੍ਰਹਿਣ ਏਸ਼ੀਆ ਦੇ ਹੋਰ ਦੇਸ਼ਾਂ ਦੇ ਨਾਲ-ਨਾਲ ਯੂਰਪ, ਅੰਟਾਰਕਟਿਕਾ, ਪੱਛਮੀ ਪ੍ਰਸ਼ਾਂਤ ਮਹਾਸਾਗਰ, ਆਸਟ੍ਰੇਲੀਆ ਅਤੇ ਹਿੰਦ ਮਹਾਸਾਗਰ ਖੇਤਰ ਵਿਚ ਵੀ ਦਿਖਾਈ ਦੇਵੇਗਾ।

21 ਤੇ 22 ਸਤੰਬਰ ਨੂੰ ਅੰਸ਼ਕ ਸੂਰਜ ਗ੍ਰਹਿਣ

ਗੁਪਤਾ ਨੇ ਕਿਹਾ ਕਿ 2025 ਦਾ ਆਖਰੀ ਗ੍ਰਹਿਣ 21 ਤੋਂ 22 ਸਤੰਬਰ ਦਰਮਿਆਨ ਅੰਸ਼ਕ ਸੂਰਜ ਗ੍ਰਹਿਣ ਵਜੋਂ ਲੱਗੇਗਾ ਅਤੇ ਇਹ ਖਗੋਲੀ ਘਟਨਾ ਭਾਰਤ ਵਿੱਚ ਦਿਖਾਈ ਨਹੀਂ ਦੇਵੇਗੀ। ਉਨ੍ਹਾਂ ਕਿਹਾ ਕਿ ਇਹ ਅੰਸ਼ਕ ਸੂਰਜ ਗ੍ਰਹਿਣ ਨਿਊਜ਼ੀਲੈਂਡ, ਪੂਰਬੀ ਮੇਲਾਨੇਸ਼ੀਆ, ਦੱਖਣੀ ਪੋਲੀਨੇਸ਼ੀਆ ਅਤੇ ਪੱਛਮੀ ਅੰਟਾਰਕਟਿਕਾ 'ਚ ਦਿਖਾਈ ਦੇਵੇਗਾ।