ਹੁਣ Subsidy'ਤੇ ਛੋਲੇ ਤੇ ਮਸਰਾਂ ਦੀ ਦਾਲ, Bharat Brand ਤਹਿਤ ਸਰਕਾਰ ਕਰੇਗੀ ਵਿਕਰੀ

ਲਾਈਵ ਪੰਜਾਬੀ ਟੀਵੀ ਬਿਊਰੋ : ਕੇਂਦਰ ਨੇ ਬੁੱਧਵਾਰ ਨੂੰ ਸਬਸਿਡੀ ਵਾਲੀ ਦਾਲਾਂ ਦੇ ਆਪਣੇ ਪ੍ਰੋਗਰਾਮ ਦੇ ਵਿਸਥਾਰ ਦਾ ਐਲਾਨ ਕੀਤਾ। ਹੁਣ ਸਰਕਾਰ ਵਧਦੀਆਂ ਕੀਮਤਾਂ ਨੂੰ ਰੋਕਣ ਲਈ 'ਭਾਰਤ' ਬ੍ਰਾਂਡ ਦੇ ਤਹਿਤ ਛੋਲਿਆਂ ਅਤੇ ਮਸਰਾਂ ਦੀ ਦਾਲ ਵੀ ਵੇਚੇਗੀ। ਖੁਰਾਕ ਅਤੇ ਖਪਤਕਾਰ ਮਾਮਲਿਆਂ ਦੇ ਮੰਤਰੀ ਪ੍ਰਹਿਲਾਦ ਜੋਸ਼ੀ ਨੇ ਦੱਸਿਆ ਕਿ ਸਹਿਕਾਰੀ ਨੈੱਟਵਰਕ ਇੰਡੀਅਨ ਨੈਸ਼ਨਲ ਕੋਆਪਰੇਟਿਵ ਕੰਜ਼ਿਊਮਰ ਫੈਡਰੇਸ਼ਨ ਲਿਮਟਿਡ (ਐੱਨ.ਸੀ.ਸੀ.ਐੱਫ.), ਨੈਸ਼ਨਲ ਐਗਰੀਕਲਚਰਲ ਕੋਆਪ੍ਰੇਟਿਵ ਮਾਰਕੀਟਿੰਗ ਫੈਡਰੇਸ਼ਨ ਆਫ ਇੰਡੀਆ ਲਿਮਟਿਡ (ਨੈਫੇਡ) ਅਤੇ ਕੇਂਦਰੀ ਭੰਡਾਰ ਰਾਹੀਂ ਛੋਲੇ 58 ਰੁਪਏ ਤੇ ਮਸਰਾਂ ਦੀ ਦਾਲ 89 ਰੁਪਏ ਪ੍ਰਤੀ ਕਿਲੋਗ੍ਰਾਮ ਦੀ ਦਰ ਨਾਲ ਵੇਚੀ ਜਾਵੇਗੀ। ਜੋਸ਼ੀ ਨੇ ਇਸ ਪਹਿਲਕਦਮੀ ਦੇ ਦੂਜੇ ਪੜਾਅ ਦੀ ਵੀ ਸ਼ੁਰੂਆਤ ਕੀਤੀ। ਉਸ ਨੇ ਕਿਹਾ ਅਸੀਂ ਮੁੱਲ ਸਥਿਰਤਾ ਫੰਡ ਦੇ ਅਧੀਨ ਰੱਖੇ ਗਏ ਆਪਣੇ ਸਟਾਕ ਨੂੰ ਸਬਸਿਡੀ ਵਾਲੀਆਂ ਕੀਮਤਾਂ 'ਤੇ ਵੇਚ ਰਹੇ ਹਾਂ। ਸਰਕਾਰ ਨੇ ਸਹਿਕਾਰੀ ਸਭਾਵਾਂ ਨੂੰ 3 ਲੱਖ ਟਨ ਛੋਲੇ ਅਤੇ 68,000 ਟਨ ਮੂੰਗ ਅਲਾਟ ਕੀਤਾ ਹੈ।

ਦਾਲਾਂ ਦੇ ਸਮਰਥਨ ਮੁੱਲ 'ਚ ਕੀਤਾ ਹੈ ਭਾਰੀ ਵਾਧਾ 

ਇਸ ਮੌਕੇ ਖੁਰਾਕ ਅਤੇ ਖਪਤਕਾਰ ਮਾਮਲਿਆਂ ਦੇ ਰਾਜ ਮੰਤਰੀ ਬੀਐੱਲ ਵਰਮਾ ਅਤੇ ਨਿਮੁਬੇਨ ਜਯੰਤੀਭਾਈ ਬੰਭਾਨੀਆ ਵੀ ਮੌਜੂਦ ਸਨ। ਪਹਿਲੇ ਪੜਾਅ ਤਹਿਤ ਮੌਜੂਦਾ ਦਰਾਂ ਕਣਕ ਦੇ ਆਟੇ ਲਈ 30 ਰੁਪਏ ਪ੍ਰਤੀ ਕਿਲੋ (27.50 ਰੁਪਏ ਤੋਂ ਵੱਧ), ਚੌਲਾਂ ਲਈ 34 ਰੁਪਏ ਪ੍ਰਤੀ ਕਿਲੋ (29 ਰੁਪਏ ਤੋਂ ਵੱਧ), ਛੋਲਿਆਂ ਲਈ 70 ਰੁਪਏ ਪ੍ਰਤੀ ਕਿਲੋ (60 ਰੁਪਏ ਤੋਂ ਵੱਧ) ਹਨ। ਮੂੰਗੀ ਦੀ ਦਾਲ ਅਤੇ ਮੂੰਗੀ ਸਾਬੂਤ ਦੀ ਕੀਮਤ ਕ੍ਰਮਵਾਰ 107 ਰੁਪਏ ਪ੍ਰਤੀ ਕਿਲੋ ਅਤੇ 93 ਰੁਪਏ ਪ੍ਰਤੀ ਕਿਲੋ ਹੈ। ਸਰਕਾਰ ਪਿਆਜ਼ ਲਈ 35 ਰੁਪਏ ਪ੍ਰਤੀ ਕਿਲੋ ਅਤੇ ਟਮਾਟਰ ਲਈ 65 ਰੁਪਏ ਪ੍ਰਤੀ ਕਿਲੋ ਦੇ ਰੇਟ ਨੂੰ ਬਰਕਰਾਰ ਰੱਖਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਕੇਂਦਰੀ ਮੰਤਰੀ ਨੇ ਇਸ ਸਾਲ ਦਾਲਾਂ ਦੇ ਬਿਹਤਰ ਉਤਪਾਦਨ ਦੀ ਉਮੀਦ ਜਤਾਈ ਹੈ ਕਿਉਂਕਿ ਸਰਕਾਰ ਨੇ ਦਾਲਾਂ ਦੇ ਸਮਰਥਨ ਮੁੱਲ ਵਿਚ ਭਾਰੀ ਵਾਧਾ ਕੀਤਾ ਹੈ।

Powered by Froala Editor