ਨੈਸ਼ਨਲ ਡੈਸਕ : ਕੁੱਤੇ ਨੂੰ ਮਨੁੱਖ ਦਾ ਸਭ ਤੋਂ ਵਫ਼ਾਦਾਰ ਜਾਨਵਰ ਮੰਨਿਆ ਜਾਂਦਾ ਹੈ। ਸਮੇਂ-ਸਮੇਂ ਤੇ ਕੁਝ ਅਜਿਹੀਆਂ ਘਟਨਾਵਾਂ ਦੇਖਣ-ਸੁਣਨ ਨੂੰ ਮਿਲਦੀਆਂ ਹਨ, ਜਿਨ੍ਹਾਂ ਤੋਂ ਕੁੱਤਿਆਂ ਦੀ ਵਫਾਦਾਰੀ ਦਾ ਪਤਾ ਲੱਗਦਾ ਹੈ। ਕਾਂਗੜਾ ਚ ਪਾਲਤੂ ਜਰਮਨ ਸ਼ੈਫਰਡ ਕੁੱਤੇ ਦੀ ਵਫ਼ਾਦਾਰੀ ਕਾਰਨ ਪੁਲਿਸ ਨੂੰ ਲਾਪਤਾ ਟਰੈਕਰ ਲੜਕੇ-ਲੜਕੀ ਦਾ ਪਤਾ ਲਗਾਉਣ ਚ ਸਫਲਤਾ ਮਿਲੀ ਹੈ। ਜੰਗਲ ਵਿੱਚ ਕੁੱਤੇ ਦੇ ਭੌਂਕਣ ਦੀ ਆਵਾਜ਼ ਸੁਣ ਕੇ ਬਚਾਅ ਟੀਮ ਲਾਸ਼ਾਂ ਕੋਲ ਪਹੁੰਚੀ। ਜਦੋਂ ਟੀਮ ਲਾਸ਼ਾਂ ਦੇ ਨੇੜੇ ਪਹੁੰਚੀ ਤਾਂ ਕੁੱਤਾ ਉਨ੍ਹਾਂ ਨੂੰ ਨੇੜੇ ਨਹੀਂ ਆਉਣ ਦੇ ਰਿਹਾ ਸੀ। ਉਨ੍ਹਾਂ ਨੇ ਬੜੀ ਮੁਸ਼ਕਲ ਨਾਲ ਕੁੱਤੇ ਨੂੰ ਭਜਾ ਦਿੱਤਾ ਅਤੇ ਲਾਸ਼ਾਂ ਨੂੰ ਕਬਜ਼ੇ ਵਿੱਚ ਲਿਆ।
ਦੱਸਿਆ ਜਾ ਰਿਹਾ ਹੈ ਕਿ 2 ਦਿਨਾਂ ਤੱਕ ਇਹ ਪਾਲਤੂ ਕੁੱਤਾ ਬਿਨਾਂ ਕੁਝ ਖਾਧੇ-ਪੀਤੇ ਆਪਣੇ ਮਾਲਕ ਦੀ ਲਾਸ਼ ਕੋਲ ਬੈਠ ਕੇ ਸੁੰਨਸਾਨ ਜੰਗਲ ਦੀ ਰਾਖੀ ਕਰਦਾ ਰਿਹਾ। ਦਰਅਸਲ, ਪਿਛਲੇ ਐਤਵਾਰ ਕਾਂਗੜਾ ਜ਼ਿਲ੍ਹੇ ਦੇ ਬੀਡ ਵਿੱਚ ਪਠਾਨਕੋਟ ਦਾ ਇੱਕ ਨੌਜਵਾਨ ਅਤੇ ਮਹਾਰਾਸ਼ਟਰ ਦੀ ਇੱਕ ਲੜਕੀ ਟ੍ਰੈਕਿੰਗ ਲਈ ਨਿਕਲੇ ਸਨ। ਦੋਵਾਂ ਦੀਆਂ ਲਾਸ਼ਾਂ ਦੋ ਦਿਨ ਬਾਅਦ ਮੰਗਲਵਾਰ ਨੂੰ ਬਰਾਮਦ ਕੀਤੀਆਂ ਗਈਆਂ। ਵੀਰਵਾਰ ਨੂੰ ਲੜਕੀ ਦੀ ਲਾਸ਼ ਪਰਿਵਾਰ ਵਾਲਿਆਂ ਨੂੰ ਸੌਂਪ ਦਿੱਤੀ ਗਈ। ਜਦੋਂਕਿ ਬੁੱਧਵਾਰ ਨੂੰ ਹੀ ਪਠਾਨਕੋਟ ਦੇ ਨੌਜਵਾਨ ਦੀ ਮ੍ਰਿਤਕ ਦੇਹ ਉਸਦੇ ਪਰਿਵਾਰ ਵਾਲਿਆਂ ਨੂੰ ਸੌਂਪ ਦਿੱਤੀ ਗਈ। ਮ੍ਰਿਤਕਾਂ ਦੀ ਪਛਾਣ ਅਭਿਨੰਦਨ ਗੁਪਤਾ (30) ਵਾਸੀ ਸ਼ਿਵਨਗਰ ਪਠਾਨਕੋਟ ਅਤੇ ਪ੍ਰਣੀਤਾ ਬਾਲਾ ਸਾਹਿਬ ਵਾਸੀ ਪੁਣੇ ਮਹਾਰਾਸ਼ਟਰ ਵਜੋਂ ਹੋਈ ਹੈ। ਪੁਲਿਸ ਮੁਤਾਬਕ ਅਭਿਨੰਦਨ ਦੇ ਭਰਾ ਨੇ ਕਾਂਗੜਾ ਪੁਲਿਸ ਨੂੰ ਉਸਦੇ ਲਾਪਤਾ ਹੋਣ ਦੀ ਸ਼ਿਕਾਇਤ ਕੀਤੀ ਸੀ। ਇਸ ਤੋਂ ਬਾਅਦ ਤਲਾਸ਼ੀ ਮੁਹਿੰਮ ਚਲਾਈ ਗਈ ਅਤੇ ਕੁੱਤੇ ਦੀ ਮਦਦ ਨਾਲ ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ। ਪੁਲਿਸ ਮੁਤਾਬਕ ਅਭਿਨੰਦਨ ਗੁਪਤਾ ਟ੍ਰੈਕਿੰਗ ਅਤੇ ਪੈਰਾਗਲਾਈਡਿੰਗ ਦਾ ਸ਼ੌਕੀਨ ਸੀ। ਉਹ ਬੀਡ ਵਿੱਚ 4 ਸਾਲਾਂ ਤੋਂ ਕਿਰਾਏ ਦੇ ਕਮਰੇ ਵਿੱਚ ਰਹਿ ਰਿਹਾ ਸੀ। ਮੁੱਢਲੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਉਨ੍ਹਾਂ ਦੇ ਨਾਲ ਦੋ ਹੋਰ ਲੜਕੇ-ਲੜਕੀਆਂ ਵੀ ਟ੍ਰੈਕਿੰਗ ਲਈ ਗਏ ਸਨ। ਪਰ ਰਸਤੇ ਵਿਚ ਮੌਸਮ ਖ਼ਰਾਬ ਹੋਣ ਤੋਂ ਬਾਅਦ ਉਹ ਵਾਪਸ ਪਰਤ ਗਏ। ਅਭਿਨੰਦਨ ਟ੍ਰੈਕ ਨੂੰ ਜਾਣਦਾ ਸੀ, ਇਸ ਲਈ ਉਹ ਆਪਣੀ ਸਹੇਲੀ ਪ੍ਰਣੀਥਾ ਨਾਲ ਅੱਗੇ ਵਧਿਆ। ਇਸ ਦੌਰਾਨ ਉਸ ਨਾਲ ਹਾਦਸਾ ਵਾਪਰ ਗਿਆ।