ਲਾਈਵ ਪੰਜਾਬੀ ਟੀਵੀ ਬਿਊਰੋ : ਡੇਰਾਬੱਸੀ-ਬਰਵਾਲਾ ਰੋਡ 'ਤੇ ਪਿੰਡ ਕੁੱਡਾਂਵਾਲਾ ਵਿਚ ਨਵ-ਵਿਆਹੁਤਾ ਦਾ ਕਤਲ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਿਸ ਨੇ ਕਾਤਲ ਪਤੀ ਨੂੰ ਕਾਬੂ ਕਰ ਲਿਆ ਹੈ। ਪੁਲਿਸ ਨੇ ਦੱਸਿਆ ਕਿ ਸੋਨੀਆ (21) ਦਾ ਵਿਆਹ 4 ਦਿਨ ਪਹਿਲਾਂ ਰਾਮਲਖਨ ਨਾਲ ਹੋਇਆ ਸੀ। ਪੁਲਿਸ ਨੇ ਲਾਸ਼ ਨੂੰ ਕਬਜ਼ੇ ਵਿਚ ਲੈ ਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।

ਏਐੱਸਆਈ ਪਾਲਚੰਦ ਨੇ ਦੱਸਿਆ ਕਿ ਸੋਨੀਆ ਵੀਰਵਾਰ ਸਵੇਰੇ 11 ਵਜੇ ਦੇ ਕਰੀਬ ਆਪਣੇ ਪਤੀ ਨਾਲ ਪਿੰਡ ਕੁੱਡਾਂਵਾਲਾ ਆਈ ਸੀ। ਸੋਨੀਆ ਦੀ ਭੈਣ ਅਤੇ ਜੀਜਾ ਮਨੋਜ ਨੇ ਉਸ ਨੂੰ ਇੱਥੇ ਅਜੀਤ ਚੌਧਰੀ ਦੇ ਘਰ ਵਿਚ ਕਿਰਾਏ 'ਤੇ ਕਮਰਾ ਲੈ ਕੇ ਦਿੱਤਾ ਸੀ। ਸ਼ਾਮ ਨੂੰ ਰਾਮਲਖਨ ਮਜ਼ਦੂਰੀ ਦਾ ਕੰਮ ਕਰਕੇ ਘਰ ਪਰਤਿਆ ਅਤੇ ਸੋਨੀਆ ਨਾਲ ਝਗੜਾ ਕਰਨ ਲੱਗਾ। ਉਸ ਨੇ ਸੋਨੀਆ ਨੂੰ ਥੱਪੜ ਮਾਰ ਦਿੱਤਾ।

ਇਸ ਤੋਂ ਬਾਅਦ ਸੋਨੀਆ ਨੇ ਆਪਣੀ ਭੈਣ ਅਤੇ ਜੀਜਾ ਨੂੰ ਬੁਲਾਇਆ ਅਤੇ ਦੋਵਾਂ ਦੇ ਸਾਹਮਣੇ ਰਾਮਲਖਨ ਨੂੰ ਥੱਪੜ ਮਾਰ ਦਿੱਤਾ। ਬੇਇੱਜ਼ਤੀ ਮਹਿਸੂਸ ਕਰਦੇ ਹੋਏ ਉਹ ਉਥੋਂ ਚਲਾ ਗਿਆ ਅਤੇ ਰਾਤ 9 ਵਜੇ ਦੇ ਕਰੀਬ ਜਦੋਂ ਸੋਨੀਆ ਸੁੱਤੀ ਹੋਈ ਸੀ ਤਾਂ ਰਾਮਲਖਨ ਨੇ ਸੋਨੀਆ ਦੇ ਚਿਹਰੇ ਅਤੇ ਗਰਦਨ 'ਤੇ ਚਾਕੂ ਨਾਲ ਕਈ ਵਾਰ ਕੀਤੇ ਅਤੇ ਉਥੋਂ ਭੱਜ ਗਿਆ। ਚੀਕਾਂ ਸੁਣ ਕੇ ਗੁਆਂਢੀ ਉਸ ਦੇ ਕਮਰੇ ਵਿਚ ਪਹੁੰਚੇ।

ਗੁਆਂਢੀ ਓਮ ਪ੍ਰਕਾਸ਼ ਨੇ ਦੱਸਿਆ ਕਿ ਸੋਨੀਆ ਬੈੱਡ 'ਤੇ ਬੇਹੋਸ਼ ਪਈ ਸੀ। ਉਸ ਨੂੰ ਸਿਵਲ ਹਸਪਤਾਲ ਡੇਰਾਬੱਸੀ ਲਿਜਾਇਆ ਗਿਆ। ਜਿੱਥੇ ਡਾਕਟਰ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਇਸ ਤੋਂ ਬਾਅਦ ਗੁਆਂਢੀਆਂ ਨੇ ਰਾਮਲਖਨ ਨੂੰ ਫੜ ਕੇ ਪੁਲਿਸ ਹਵਾਲੇ ਕਰ ਦਿੱਤਾ। ਏਐੱਸਆਈ ਪਾਲ ਚੰਦ ਨੇ ਦੱਸਿਆ ਕਿ ਰਾਮਲੱਖਣ ਸੀਤਾਪੁਰ, ਯੂਪੀ ਦਾ ਰਹਿਣ ਵਾਲਾ ਹੈ। ਫਿਲਹਾਲ ਦੋਸ਼ੀ ਹਿਰਾਸਤ 'ਚ ਹੈ।