America ਦਾ ਵੱਡਾ ਐਕਸ਼ਨ: ‘Operation Hawkeye’ ਤਹਿਤ ਸੀਰੀਆ ਵਿੱਚ ਅੱਤ*ਵਾਦੀਆਂ ਦੇ 12 ਟਿਕਾਣੇ ਕੀਤੇ ਤ*ਬਾਹ

ਵਾਸ਼ਿੰਗਟਨ/ਦਮਿਸ਼ਕ, 20 ਦਸੰਬਰ:ਅਮਰੀਕਾ ਨੇ ਆਪਣੇ ਦੋ ਸੈਨਿਕਾਂ ਦੀ ਮੌਤ ਦਾ ਸਖ਼ਤ ਜਵਾਬ ਦਿੰਦਿਆਂ ਸੀਰੀਆ ਵਿੱਚ ਅੱਤਵਾਦੀ ਸੰਗਠਨ ISIS ਖ਼ਿਲਾਫ਼ ਵੱਡੀ ਫੌਜੀ ਕਾਰਵਾਈ ਕੀਤੀ ਹੈ। ਅਮਰੀਕੀ ਹਵਾਈ ਫੌਜ ਨੇ ‘ਆਪ੍ਰੇਸ਼ਨ ਹਾਕਆਈ’ ਦੇ ਤਹਿਤ ਸੀਰੀਆ ਦੇ ਵੱਖ-ਵੱਖ ਇਲਾਕਿਆਂ ਵਿੱਚ ਅੱਤਵਾਦੀਆਂ ਨਾਲ ਜੁੜੇ 12 ਤੋਂ ਵੱਧ ਟਿਕਾਣਿਆਂ ’ਤੇ ਹਵਾਈ ਹਮਲੇ ਕੀਤੇ ਹਨ।

ਅਮਰੀਕੀ ਅਧਿਕਾਰੀਆਂ ਮੁਤਾਬਕ, ਇਹ ਕਾਰਵਾਈ 13 ਦਸੰਬਰ ਨੂੰ ਹੋਏ ਉਸ ਹਮਲੇ ਦੇ ਜਵਾਬ ਵਜੋਂ ਕੀਤੀ ਗਈ ਹੈ, ਜਿਸ ਵਿੱਚ ਸੀਰੀਆ ਵਿੱਚ ਤੈਨਾਤ ਅਮਰੀਕਾ ਦੇ ਦੋ ਜਵਾਨ ਮਾਰੇ ਗਏ ਸਨ। ਹਮਲਿਆਂ ਦੌਰਾਨ ਅੱਤਵਾਦੀਆਂ ਦੇ ਲੁਕਣ ਵਾਲੇ ਅੱਡਿਆਂ ਅਤੇ ਹਥਿਆਰਾਂ ਦੇ ਢੇਰਾਂ ਨੂੰ ਨਿਸ਼ਾਨਾ ਬਣਾਇਆ ਗਿਆ।

‘Operation Hawkeye’ ਨਾਮ ਪਿੱਛੇ ਕੀ ਹੈ ਵਜ੍ਹਾ?

ਇਸ ਫੌਜੀ ਮਿਸ਼ਨ ਦਾ ਨਾਮ ਸ਼ਹੀਦ ਸੈਨਿਕਾਂ ਦੀ ਯਾਦ ਵਿੱਚ ਰੱਖਿਆ ਗਿਆ ਹੈ। ਮਾਰੇ ਗਏ ਦੋਵੇਂ ਅਮਰੀਕੀ ਜਵਾਨ ਆਇਓਵਾ ਸੂਬੇ ਨਾਲ ਸਬੰਧਤ ਸਨ, ਜਿਸਨੂੰ ਅਮਰੀਕਾ ਵਿੱਚ ‘ਹਾਕਆਈ ਸਟੇਟ’ ਕਿਹਾ ਜਾਂਦਾ ਹੈ। ਸ਼ਹੀਦਾਂ ਦੀ ਪਛਾਣ 25 ਸਾਲਾ ਸਾਰਜੈਂਟ ਐਡਗਰ ਬ੍ਰਾਇਨ ਟੋਰੇਸ ਟੋਵਰ ਅਤੇ 29 ਸਾਲਾ ਸਾਰਜੈਂਟ ਵਿਲੀਅਮ ਨਥਾਨੀਅਲ ਹਾਵਰਡ ਵਜੋਂ ਹੋਈ ਹੈ, ਜੋ ਆਇਓਵਾ ਨੈਸ਼ਨਲ ਗਾਰਡ ਦਾ ਹਿੱਸਾ ਸਨ।

ਅਮਰੀਕੀ ਨੇਤ੍ਰਿਤਵ ਦੀ ਸਖ਼ਤ ਚੇਤਾਵਨੀ

ਅਮਰੀਕੀ ਰੱਖਿਆ ਮੰਤਰੀ ਪੀਟ ਹੇਗਸੇਥ ਨੇ ਕਿਹਾ ਕਿ ਇਹ ਕਾਰਵਾਈ ਕਿਸੇ ਨਵੀਂ ਜੰਗ ਦੀ ਸ਼ੁਰੂਆਤ ਨਹੀਂ, ਬਲਕਿ ਹਮਲੇ ਦਾ ਜਵਾਬ ਹੈ। ਉਨ੍ਹਾਂ ਦੱਸਿਆ ਕਿ ਅਮਰੀਕਾ ਆਪਣੇ ਸੈਨਿਕਾਂ ਦੀ ਸੁਰੱਖਿਆ ਨਾਲ ਕੋਈ ਸਮਝੌਤਾ ਨਹੀਂ ਕਰੇਗਾ।

ਉੱਥੇ ਹੀ, ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਵੀ ਸਪੱਸ਼ਟ ਕੀਤਾ ਕਿ ਉਨ੍ਹਾਂ ਦੀ ਅਗਵਾਈ ਹੇਠ ਅਮਰੀਕਾ ’ਤੇ ਹਮਲਾ ਕਰਨ ਵਾਲਿਆਂ ਨੂੰ ਕਰਾਰਾ ਜਵਾਬ ਮਿਲੇਗਾ। ਉਨ੍ਹਾਂ ਦੱਸਿਆ ਕਿ ਸ਼ਹੀਦ ਸੈਨਿਕਾਂ ਦੀਆਂ ਮ੍ਰਿਤਕ ਦੇਹਾਂ ਨੂੰ ਪੂਰੇ ਸਰਕਾਰੀ ਸਨਮਾਨ ਨਾਲ ਵਤਨ ਲਿਆਂਦਾ ਗਿਆ ਹੈ।

ਸੀਰੀਆ ਵਿੱਚ ਅਜੇ ਵੀ ਬਣਿਆ ਹੋਇਆ ਹੈ ਅੱਤਵਾਦੀ ਖ਼ਤਰਾ

ਅਮਰੀਕੀ ਸਰੋਤਾਂ ਅਨੁਸਾਰ, ਸੀਰੀਆ ਵਿੱਚ ਅਜੇ ਵੀ ਸੈਂਕੜੇ ਅਮਰੀਕੀ ਸੈਨਿਕ ਤੈਨਾਤ ਹਨ ਜੋ ISIS ਖ਼ਿਲਾਫ਼ ਲੜਾਈ ਜਾਰੀ ਰੱਖੇ ਹੋਏ ਹਨ। ਭਾਵੇਂ ਪਿਛਲੇ ਸਾਲਾਂ ਵਿੱਚ ISIS ਦੀ ਤਾਕਤ ਕਮਜ਼ੋਰ ਹੋਈ ਹੈ, ਪਰ ਉਸਦੇ ਬਚੇ-ਖੁੱਚੇ ਲੜਾਕੂ ਅਜੇ ਵੀ ਖ਼ਤਰਾ ਬਣੇ ਹੋਏ ਹਨ।

ਅਮਰੀਕਾ ਨੇ ਦੋਹਰਾਇਆ ਹੈ ਕਿ ‘ਆਪ੍ਰੇਸ਼ਨ ਇਨਹੇਰੈਂਟ ਰਿਜ਼ੋਲਵ’ ਦੇ ਤਹਿਤ ਅੱਤਵਾਦੀ ਨੈੱਟਵਰਕ ਨੂੰ ਖਤਮ ਕਰਨ ਲਈ ਕਾਰਵਾਈਆਂ ਜਾਰੀ ਰਹਿਣਗੀਆਂ।