ਨੈਸ਼ਨਲ ਡੈਸਕ : ਜੁਲਾਈ 2024 ਤੋਂ ਪ੍ਰਾਈਵੇਟ ਮੋਬਾਈਲ ਕੰਪਨੀਆਂ ਦੁਆਰਾ ਟੈਰਿਫ ਵਿਚ 25 ਫੀਸਦੀ ਤੱਕ ਦਾ ਵਾਧਾ ਕੀਤੇ ਜਾਣ ਤੋਂ ਬਾਅਦ ਬੀਐਸਐਨਐਲ (ਭਾਰਤ ਸੰਚਾਰ ਨਿਗਮ ਲਿਮਟਿਡ) ਵਿਚ ਗਾਹਕਾਂ ਦੀ ਵਾਪਸੀ ਵੇਖੀ ਜਾ ਰਹੀ ਹੈ। ਦੋ ਦਹਾਕੇ ਪਹਿਲਾਂ ਭਾਰਤੀ ਟੈਲੀਕਾਮ ਮਾਰਕੀਟ ਵਿਚ ਬੀਐਸਐਨਐਲ ਦੀ ਹਿੱਸੇਦਾਰੀ 18 ਫੀਸਦੀ ਤੋਂ ਵੱਧ ਰੱਖਦੀ ਸੀ, ਪਰ ਹੁਣ ਇਸਦੀ ਹਿੱਸੇਦਾਰੀ 2.5 ਫੀਸਦੀ ਤੋਂ ਵੀ ਘੱਟ ਰਹਿ ਗਈ ਹੈ। ਬੀਐਸਐਨਐਲ ਨੂੰ ਮਈ ਵਿਚ 15,000 ਨਵੇਂ ਗਾਹਕ ਮਿਲੇ ਸੀ, ਜਦੋਂ ਕਿ ਜੂਨ ਵਿੱਚ ਇਹ ਗਿਣਤੀ ਘਟ ਗਈ। ਹਾਲਾਂਕਿ, ਜੁਲਾਈ ਦੇ ਪਹਿਲੇ 15 ਦਿਨਾਂ ਵਿੱਚ ਹੀ, ਬੀਐਸਐਨਐਲ ਨੇ 15 ਲੱਖ ਤੋਂ ਵੱਧ ਨਵੇਂ ਗਾਹਕਾਂ ਨੂੰ ਜੋੜਿਆ ਹੈ। ਖਾਸ ਤੌਰ 'ਤੇ, ਪੰਜਾਬ ਤੋਂ 50,099 ਨਵੇਂ ਗਾਹਕ ਸ਼ਾਮਲ ਹੋਏ ਹਨ ਅਤੇ ਲਗਭਗ 2.5 ਲੱਖ ਗਾਹਕ, ਜੋ ਪਹਿਲਾਂ Jio, Airtel ਅਤੇ Idea ਦੀ ਵਰਤੋਂ ਕਰ ਰਹੇ ਸੀ, ਵਾਪਸ BSNL ਵਿੱਚ ਆਏ ਹਨ। ਬੀਐਸਐਨਐਲ ਨੇ ਪਿਛਲੇ 8 ਸਾਲਾਂ ਵਿਚ ਲਗਭਗ 7 ਕਰੋੜ (76ਫੀਸਦੀ) ਗਾਹਕ ਗੁਆ ਦਿੱਤੇ ਸੀ, ਪਰ ਹੁਣ 15 ਦਿਨਾਂ ਵਿਚ 6.34 ਫੀਸਦੀ ਨਵੇਂ ਗਾਹਕ ਸ਼ਾਮਲ ਹੋਏ ਹਨ। ਇਹ ਦਰਸਾਉਂਦਾ ਹੈ ਕਿ BSNL ਟੈਰਿਫ ਵਾਧੇ ਤੋਂ ਬਾਅਦ ਗਾਹਕਾਂ ਲਈ ਇੱਕ ਕਿਫਾਇਤੀ ਵਿਕਲਪ ਵਜੋਂ ਮੁੜ ਉੱਭਰ ਰਿਹਾ ਹੈ।

ਪੋਰਟ ਵਿਚ ਵਾਧਾ : ਬੀਐਸਐਨਐਲ ਗਾਹਕ ਪੋਰਟਿੰਗ ਵਿਚ ਵੀ ਵਾਧਾ ਦੇਖ ਰਿਹਾ ਹੈ (ਗਾਹਕ ਜੋ ਕਿਸੇ ਹੋਰ ਕੰਪਨੀ ਤੋਂ ਸ਼ਿਫਟ ਹੋਏ ਹਨ)। ਇਸ ਰੁਝਾਨ ਵਿੱਚ ਉੱਤਰ ਪ੍ਰਦੇਸ਼, ਪੱਛਮੀ ਬੰਗਾਲ ਅਤੇ ਆਂਧਰਾ ਪ੍ਰਦੇਸ਼ ਸਭ ਤੋਂ ਉੱਪਰ ਹਨ।

ਸਭ ਤੋਂ ਵੱਧ ਗਾਹਕਾਂ ਵਾਲੇ ਚੋਟੀ ਦੇ 5 ਰਾਜ

ਯੂਪੀ (ਪੂਰਬ-ਪੱਛਮ) 2,98,163, ਚੇਨਈ ਤਾਮਿਲਨਾਡੂ 1,19,479, ਮਹਾਰਾਸ਼ਟਰ 98,328, ਬੰਗਾਲ-ਸਿੱਕਮ 89,953, ਰਾਜਸਥਾਨ 81,891

ਕੰਪਨੀ ਦੇ ਗਾਹਕ (ਕਰੋੜਾਂ ਵਿਚ)

ਰਿਲਾਇੰਸ ਜੀਓ 47.46, ਭਾਰਤੀ ਏਅਰਟੈੱਲ 27.01, ਵੋਡਾ-ਆਈਡੀਆ 12.72, ਬੀਐਸਐਨਐਲ 2.16