ਲਾਈਵ ਪੰਜਾਬੀ ਟੀਵੀ ਬਿਊਰੋ : ਹੋਮ ਲੋਨ, ਪਰਸਨਲ ਲੋਨ, ਕਾਰ ਲੋਨ ਅਤੇ ਐਜੂਕੇਸ਼ਨ ਲੋਨ ਸਮੇਤ ਹਰ ਤਰ੍ਹਾਂ ਦੇ ਲੋਨ 'ਤੇ ਆਉਣ ਵਾਲੇ ਸਮੇਂ 'ਚ ਵਿਆਜ ਦਰਾਂ ਘੱਟ ਸਕਦੀਆਂ ਹਨ। ਇਸ ਨਾਲ ਤੁਹਾਡੇ ਮੌਜੂਦਾ ਲੋਨ ਦਾ ਈਐਮਆਈ ਬੋਝ ਵੀ ਘੱਟ ਜਾਵੇਗਾ। ਦਰਅਸਲ, ਆਰਬੀਆਈ ਦੀ ਮੁੱਖ ਵਿਆਜ ਦਰ ਰੇਪੋ ਦਰ ਵਿਚ ਕਟੌਤੀ ਦੀਆਂ ਉਮੀਦਾਂ ਵੱਧ ਰਹੀਆਂ ਹਨ। ਐਸਬੀਆਈ ਰਿਸਰਚ ਈਕੋਰੈਪ ਦੇ ਅਨੁਸਾਰ, ਆਰਬੀਆਈ ਸਾਲ 2025 ਵਿਚ ਰੈਪੋ ਦਰ ਵਿਚ ਕੁੱਲ 0.75% ਦੀ ਕਟੌਤੀ ਕਰ ਸਕਦਾ ਹੈ। ਅਪ੍ਰੈਲ, ਜੂਨ ਅਤੇ ਅਕਤੂਬਰ ਦੀਆਂ ਅੱਗ ਹੋਣ ਵਾਲੀਆਂ ਨੀਤੀਗਤ ਬੈਠਕਾਂ 'ਚ ਹਰ ਵਾਰ 0.25 ਫੀਸਦੀ ਦੀ ਕਟੌਤੀ ਦੀ ਸੰਭਾਵਨਾ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਚਾਲੂ ਵਿੱਤੀ ਸਾਲ ਦੀ ਚੌਥੀ ਤਿਮਾਹੀ 'ਚ ਪ੍ਰਚੂਨ ਮਹਿੰਗਾਈ ਦਰ 3.9 ਫੀਸਦੀ ਰਹਿਣ ਦੀ ਉਮੀਦ ਹੈ। ਉਥੇ ਹੀ ਪੂਰੇ ਸਾਲ ਲਈ ਔਸਤ ਮਹਿੰਗਾਈ ਦਰ 4.7 ਫੀਸਦੀ ਰਹਿਣ ਦਾ ਅਨੁਮਾਨ ਹੈ। ਮਹਿੰਗਾਈ ਦਰ ਵਿਚ ਆਈ ਗਿਰਾਵਟ ਨਾਲ ਆਰਬੀਆਈ ਨੂੰ ਰੇਪੋ ਦਰ ਵਿਚ ਕਟੌਤੀ ਲਈ ਸਪੋਰਟ ਮਿਲੇਗਾ।

ਅਪ੍ਰੈਲ ਤੇ ਜੂਨ 'ਚ  ਘੱਟ ਸਕਦੀਆਂ ਹਨ ਵਿਆਜ ਦਰਾਂ

ਹਾਲਾਂਕਿ, ਵਿੱਤੀ ਸਾਲ 2026 ਵਿਚ ਮਹਿੰਗਾਈ ਦੇ 4 ਫੀਸਦੀ ਤੋਂ 4.2 ਫੀਸਦੀ ਦੇ ਵਿਚਕਾਰ ਰਹਿਣ ਦੀ ਉਮੀਦ ਹੈ, ਜਿਸ ਵਿਚ ਕੋਰ ਮਹਿੰਗਾਈ 4.2 ਫੀਸਦੀ ਤੋਂ 4.4 ਫੀਸਦੀ ਦੇ ਵਿਚਕਾਰ ਰਹੇਗੀ। ਕੰਟਰੋਲਡ ਮਹਿੰਗਾਈ ਨੂੰ ਦੇਖਦੇ ਹੋਏ ਐਸਬੀਆਈ ਖੋਜ ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ  ਇਸ ਚੱਕਰ ਵਿਚ ਆਰਬੀਆਈ ਰੇਪੋ ਦਰ ਨੂੰ 0.75 ਪ੍ਰਤੀਸ਼ਤ ਘਟਾ ਸਕਦਾ ਹੈ। ਆਰਬੀਆਈ ਅਪ੍ਰੈਲ ਅਤੇ ਜੂਨ 2025 ਵਿਚ ਲਗਾਤਾਰ ਰੇਪੋ ਦਰਾਂ ਵਿਚ ਕਟੌਤੀ ਕਰ ਸਕਦਾ ਹੈ। ਇਸ ਤੋਂ ਬਾਅਦ ਦਰਾਂ ਵਿਚ ਕਟੌਤੀ ਦਾ ਨਵਾਂ ਦੌਰ ਅਕਤੂਬਰ 2025 ਵਿਚ ਸ਼ੁਰੂ ਹੋ ਸਕਦਾ ਹੈ। ਐਸਬੀਆਈ ਰਿਸਰਚ ਇਕੋਰੈਪ ਨੇ ਕਿਹਾ ਕਿ ਇਸ ਮਹੀਨੇ ਅਤੇ ਅਗਲੇ ਮਹੀਨਿਆਂ ਵਿਚ ਹੌਲੀ ਮਹਿੰਗਾਈ ਦੇ ਨਾਲ ਸਾਨੂੰ ਉਮੀਦ ਹੈ ਕਿ  ਇਸ ਚੱਕਰ ਵਿਚ ਰੈਪੋ ਦਰ ਵਿਚ 0.75 ਪ੍ਰਤੀਸ਼ਤ ਦੀ ਕਟੌਤੀ ਹੋ ਸਕਦੀ ਹੈ। ਅਗਲੀ ਅਪ੍ਰੈਲ ਅਤੇ ਜੂਨ ਦੀ ਨੀਤੀਗਤ ਮੀਟਿੰਗ ਵਿਚ ਲਗਾਤਾਰ ਦਰਾਂ ਵਿਚ ਕਟੌਤੀ ਦੀ ਉਮੀਦ ਹੈ। ਇਸ ਤੋਂ ਬਾਅਦ ਅਕਤੂਬਰ 2025 ਤੋਂ ਦਰਾਂ ਵਿਚ ਕਟੌਤੀ ਦਾ ਇਕ ਨਵਾਂ ਚੱਕਰ ਦੁਬਾਰਾ ਸ਼ੁਰੂ ਹੋ ਸਕਦਾ ਹੈ।

ਫਰਵਰੀ 2025 ਵਿਚ ਭਾਰਤ ਦੀ ਪ੍ਰਚੂਨ ਮਹਿੰਗਾਈ ਦਰ ਸੱਤ ਮਹੀਨੇ ਦੇ ਹੇਠਲੇ ਪੱਧਰ 3.6 ਪ੍ਰਤੀਸ਼ਤ 'ਤੇ ਆ ਗਈ ਸੀ। ਮੁੱਖ ਰੂਪ ਨਾਲ ਖਾਣ-ਪੀਣ ਦੀਆਂ ਵਸਤੂਆਂ ਦੀਆਂ ਕੀਮਤਾਂ ਵਿਚ ਤੇਜ਼ੀ ਨਾਲ ਗਿਰਾਵਟ ਕਾਰਨ ਮਹਿੰਗਾਈ ਦਰ ਹੇਠਾਂ ਆਈ ਹੈ। ਸਬਜ਼ੀਆਂ ਦੀਆਂ ਕੀਮਤਾਂ ਵਿਚ ਮਹੱਤਵਪੂਰਨ ਗਿਰਾਵਟ ਦੇ ਕਾਰਨ ਖਾਣ-ਪੀਣ ਦੀਆਂ ਵਸਤੂਆਂ ਦੀ ਮਹਿੰਗਾਈ ਦਰ 3.84 ਫੀਸਦੀ 'ਤੇ ਆ ਗਈ। ਲਸਣ, ਆਲੂ ਅਤੇ ਟਮਾਟਰ ਦੀਆਂ ਕੀਮਤਾਂ ਵਿੱਚ ਭਾਰੀ ਗਿਰਾਵਟ ਕਾਰਨ ਸਬਜ਼ੀਆਂ ਦੀ ਮਹਿੰਗਾਈ 20 ਮਹੀਨਿਆਂ ਵਿੱਚ ਪਹਿਲੀ ਵਾਰ ਨਕਾਰਾਤਮਕ ਹੋ ਗਈ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਮਹਾਕੁੰਭ ਨੇ ਲਸਣ ਦੀ ਖਪਤ ਨੂੰ ਘਟਾ ਦਿੱਤਾ ਹੈ, ਜਦੋਂ ਕਿ ਵਰਤ ਦੇ ਸਮੇਂ ਦੌਰਾਨ ਮੰਗ ਵਧਣ ਨਾਲ ਫਲਾਂ ਦੀਆਂ ਕੀਮਤਾਂ ਵਿੱਚ ਵਾਧਾ ਹੋਇਆ ਹੈ।