CM Mann ਅੱਜ ਪੰਜਾਬ ਦੀਆਂ ਵਿਸ਼ਵ ਕੱਪ ਜੇਤੂ ਸ਼ੇਰਨੀਆਂ ਨੂੰ ਕਰਨਗੇ ਸਨਮਾਨਿਤ
Punjab
CM Mann ਅੱਜ ਪੰਜਾਬ ਦੀਆਂ ਵਿਸ਼ਵ ਕੱਪ ਜੇਤੂ ਸ਼ੇਰਨੀਆਂ ਨੂੰ ਕਰਨਗੇ ਸਨਮਾਨਿਤ
ਚੰਡੀਗੜ੍ਹ/ਮੁੱਲਾਂਪੁਰ, 11 ਦਸੰਬਰ, 2025: ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਦੇ ਇਤਿਹਾਸਕ ਵਰਲਡ ਕੱਪ ਜਿੱਤ ਦੇ ਮੌਕੇ 'ਤੇ ਪੰਜਾਬ ਸਰਕਾਰ ਵੱਲੋਂ ਅੱਜ ਇੱਕ ਵਿਸ਼ੇਸ਼ ਸਨਮਾਨ ਸਮਾਗਮ ਕੀਤਾ ਜਾ ਰਿਹਾ ਹੈ। ਮੁੱਖ ਮੰਤਰੀ ਭਗਵੰਤ ਮਾਨ (CM Bhagwant Mann) ਪੰਜਾਬ ਦੀਆਂ ਉਹਨਾਂ ਖਿਡਾਰਣਾਂ ਨੂੰ ਸਨਮਾਨਿਤ ਕਰਨਗੇ ਜਿਨ੍ਹਾਂ ਨੇ ਟੀਮ ਦੀ ਜਿੱਤ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ। ਇਹ ਪ੍ਰੋਗਰਾਮ ਅੱਜ ਸ਼ਾਮ ਕਰੀਬ 5:30 ਵਜੇ ਮੁੱਲਾਂਪੁਰ (Mullanpur) ਦੇ ਨਵੇਂ ਇੰਟਰਨੈਸ਼ਨਲ ਕ੍ਰਿਕਟ ਸਟੇਡੀਅਮ ਵਿੱਚ ਹੋਵੇਗਾ।
CM Mann ਦਾ ਟਵੀਟ — “ਚੱਕ ਦੇ ਇੰਡੀਆ!”
ਸੀਐਮ ਮਾਨ ਨੇ ਇਸ ਸਮਾਗਮ ਦੀ ਪੁਸ਼ਟੀ ਕਰਦੇ ਹੋਏ ਟਵੀਟ ਵਿੱਚ ਲਿਖਿਆ: “ਅੱਜ 11 ਦਸੰਬਰ ਸ਼ਾਮ 5:30 ਵਜੇ ਭਾਰਤੀ ਮਹਿਲਾ ਟੀਮ ਦੀਆਂ ਪੰਜਾਬੀ ਖਿਡਾਰਣਾਂ — ਕਪਤਾਨ ਹਰਮਨਪ੍ਰੀਤ ਕੌਰ, ਅਮਨਜੋਤ ਕੌਰ, ਹਰਲੀਨ ਕੌਰ ਦਿਓਲ - ਅਤੇ ਕੋਚਿੰਗ ਸਟਾਫ਼ ਨੂੰ ਮੁੱਲਾਂਪੁਰ ਦੇ ਨਵੇਂ ਸਟੇਡੀਅਮ ਵਿੱਚ ਸਨਮਾਨਿਤ ਕੀਤਾ ਜਾਵੇਗਾ। ਇਸ ਮੌਕੇ 'ਤੇ ਯੁਵਰਾਜ ਸਿੰਘ ਅਤੇ ਹਰਮਨਪ੍ਰੀਤ ਦੇ ਨਾਂ 'ਤੇ ਬਣੇ ਨਵੇਂ ਸਟੈਂਡਾਂ ਦਾ ਉਦਘਾਟਨ ਵੀ ਕੀਤਾ ਜਾਵੇਗਾ… ਚੱਕ ਦੇ ਇੰਡੀਆ!”
47 ਸਾਲਾਂ ਬਾਅਦ ਮਿਲੀ ਇਤਿਹਾਸਕ ਜਿੱਤ
ਭਾਰਤੀ ਮਹਿਲਾ ਟੀਮ ਨੇ 47 ਸਾਲਾਂ ਦੇ ਇੰਤਜ਼ਾਰ ਨੂੰ ਖ਼ਤਮ ਕਰਦੇ ਹੋਏ ਪਹਿਲੀ ਵਾਰ ਵਨਡੇ ਵਰਲਡ ਕੱਪ (ODI World Cup) ਜਿੱਤਿਆ। ਫਾਈਨਲ ਵਿੱਚ ਭਾਰਤ ਨੇ ਦੱਖਣੀ ਅਫ਼ਰੀਕਾ ਨੂੰ 52 ਦੌੜਾਂ ਨਾਲ ਹਰਾਇਆ ਤੇ ਵੱਡੇ ਮੰਚ 'ਤੇ ਆਪਣੀ ਦਬਦਬੇਦਾਰ ਪ੍ਰਦਰਸ਼ਨ ਦਾ ਲੋਹਾ ਮਨਵਾਇਆ।
ਡੀਵਾਈ ਪਾਟਿਲ ਸਟੇਡੀਅਮ ਵਿੱਚ ਭਾਰਤ ਨੇ ਪਹਿਲਾਂ ਖੇਡਦੇ ਹੋਏ 298 ਦੌੜਾਂ ਬਣਾਈਆਂ, ਜਦਕਿ ਦੱਖਣੀ ਅਫ਼ਰੀਕਾ ਦੀ ਪੂਰੀ ਟੀਮ 246 'ਤੇ ਸਿਮਟ ਗਈ। 21 ਸਾਲਾ ਸ਼ੇਫ਼ਾਲੀ ਵਰਮਾ 87 ਦੌੜਾਂ ਅਤੇ 2 ਵਿਕਟਾਂ ਦੀ ਬਦੌਲਤ ‘ਪਲੇਅਰ ਆਫ਼ ਦ ਫਾਈਨਲ’ ਬਣੀ, ਜਦਕਿ ਦੀਪਤੀ ਸ਼ਰਮਾ ਨੂੰ ਟੂਰਨਾਮੈਂਟ ਦਾ ਸਰਵੋਤਮ ਖਿਡਾਰੀ ਚੁਣਿਆ ਗਿਆ।
ਸੰਘਰਸ਼ ਤੋਂ ਸ਼ਾਨ ਤੱਕ - ਮਹਿਲਾ ਕ੍ਰਿਕਟ ਦਾ ਸਫ਼ਰ
ਮਹਿਲਾ ਵਰਲਡ ਕੱਪ 1972 ਵਿੱਚ ਸ਼ੁਰੂ ਹੋਇਆ ਸੀ, ਜਦਕਿ ਭਾਰਤ ਨੇ ਪਹਿਲੀ ਵਾਰ 1979 ਵਿੱਚ ਟੂਰਨਾਮੈਂਟ ਵਿੱਚ ਪੜਾਅ ਰੱਖਿਆ। 2005 ਅਤੇ 2017 ਵਿੱਚ ਫਾਈਨਲ ਤੱਕ ਪਹੁੰਚਣ ਦੇ ਬਾਵਜੂਦ ਖਿਤਾਬ ਨਹੀਂ ਜਿੱਤ ਸਕੇ।
2025 ਦੇ ਵਰਲਡ ਕੱਪ ਨਾਲ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਨੇ ਨਾ ਸਿਰਫ ਆਪਣੀ ਪਹਿਲੀ ICC Trophy ਜਿੱਤੀ ਹੈ, ਸਗੋਂ 25 ਸਾਲਾਂ ਬਾਅਦ ਦੇਸ਼ ਨੂੰ ਨਵਾਂ ਵਰਲਡ ਚੈਂਪੀਅਨ ਵੀ ਦਿੱਤਾ ਹੈ।
CM Mann Will Honour Punjab s World Cup Winning Lionesses Today
