April 22, 2025
ਕੋਲਕਾਤਾ, 22 ਅਪ੍ਰੈਲ 2025: ਗੁਜਰਾਤ ਟਾਈਟਨਜ਼ (GT) ਨੇ ਪਿਛਲੇ ਚੈਂਪੀਅਨ ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਨੂੰ 39 ਦੌੜਾਂ ਨਾਲ ਹਰਾ ਕੇ ਸਿਖਰ 'ਤੇ ਆਪਣਾ ਦਬਦਬਾ ਮਜ਼ਬੂਤ ਕੀਤਾ। ਗੁਜਰਾਤ ਨੇ ਸ਼ੁਭਮਨ ਗਿੱਲ ਅਤੇ ਸਾਈ ਸੁਦਰਸ਼ਨ ਦੇ ਅਰਧ ਸੈਂਕੜਿਆਂ ਦੀ ਬਦੌਲਤ 20 ਓਵਰਾਂ 'ਚ 3 ਵਿਕਟਾਂ 'ਤੇ 198 ਦੌੜਾਂ ਬਣਾਈਆਂ, ਜਿਸ ਦੇ ਜਵਾਬ 'ਚ ਕੇਕੇਆਰ 20 ਓਵਰਾਂ ਵਿੱਚ 8 ਵਿਕਟਾਂ 'ਤੇ 159 ਦੌੜਾਂ ਹੀ ਬਣਾ ਸਕਿਆ। ਇਸ ਸੀਜ਼ਨ 'ਚ ਇਹ ਪਹਿਲਾ ਮੌਕਾ ਹੈ ਜਦੋਂ ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਲਗਾਤਾਰ ਦੋ ਮੈਚ ਹਾਰਿਆ ਹੈ।
ਇਹ ਗੁਜਰਾਤ ਦੀ ਅੱਠ ਮੈਚਾਂ 'ਚ ਛੇਵੀਂ ਜਿੱਤ ਹੈ ਅਤੇ ਉਹ 12 ਅੰਕਾਂ ਨਾਲ ਸਿਖਰ 'ਤੇ ਬਣਿਆ ਹੋਇਆ ਹੈ। ਗੁਜਰਾਤ ਇਸ ਸੀਜ਼ਨ 'ਚ ਦੋ ਮੈਚ ਹਾਰ ਚੁੱਕਾ ਹੈ। ਇਸ ਦੇ ਨਾਲ ਹੀ, ਇਹ ਕੇਕੇਆਰ ਦੀ ਅੱਠ ਮੈਚਾਂ 'ਚ ਪੰਜਵੀਂ ਹਾਰ ਹੈ ਅਤੇ ਉਹ ਤਿੰਨ ਜਿੱਤਾਂ ਤੋਂ ਬਾਅਦ ਛੇ ਅੰਕਾਂ ਨਾਲ ਅੰਕ ਸੂਚੀ ਵਿੱਚ ਸੱਤਵੇਂ ਸਥਾਨ 'ਤੇ ਹੈ।
ਕੇਕੇਆਰ ਵੱਲੋਂ ਕਪਤਾਨ ਅਜਿੰਕਿਆ ਰਹਾਣੇ ਸਭ ਤੋਂ ਵੱਧ ਸਕੋਰਰ ਰਹੇ ਜਿਨ੍ਹਾਂ ਨੇ 36 ਗੇਂਦਾਂ 'ਚ ਪੰਜ ਚੌਕੇ ਅਤੇ ਇੱਕ ਛੱਕੇ ਦੀ ਮਦਦ ਨਾਲ 50 ਦੌੜਾਂ ਬਣਾਈਆਂ। ਟੀਚੇ ਦਾ ਪਿੱਛਾ ਕਰਦੇ ਹੋਏ, ਕੇਕੇਆਰ ਦੀ ਸ਼ੁਰੂਆਤ ਚੰਗੀ ਨਹੀਂ ਸੀ ਅਤੇ ਉਸਨੇ ਗੁਰਬਾਜ਼ ਦੀ ਵਿਕਟ ਜਲਦੀ ਹੀ ਗੁਆ ਦਿੱਤੀ। ਇਸ ਤੋਂ ਬਾਅਦ ਰਹਾਣੇ ਨੇ ਸੁਨੀਲ ਨਾਰਾਇਣ ਨਾਲ ਮਿਲ ਕੇ ਟੀਮ ਦੀ ਕਮਾਨ ਸੰਭਾਲੀ, ਪਰ ਨਾਰਾਇਣ 17 ਦੌੜਾਂ ਬਣਾ ਕੇ ਆਊਟ ਹੋ ਗਿਆ।
ਰਹਾਣੇ ਨੇ ਫਿਰ ਚੰਗੀ ਪਾਰੀ ਖੇਡੀ, ਪਰ ਦੂਜੇ ਸਿਰੇ ਤੋਂ ਕੋਈ ਵੀ ਬੱਲੇਬਾਜ਼ ਉਸਦਾ ਸਾਥ ਨਹੀਂ ਦੇ ਸਕਿਆ। ਵੱਡੀ ਸਾਂਝੇਦਾਰੀ ਨਾ ਬਣ ਸਕਣਾ ਕੇਕੇਆਰ ਦੀ ਹਾਰ ਦਾ ਇੱਕ ਵੱਡਾ ਕਾਰਨ ਬਣ ਗਿਆ। ਇਹ ਕੇਕੇਆਰ ਦੀ ਲਗਾਤਾਰ ਦੂਜੀ ਹਾਰ ਹੈ। ਇਸ ਤੋਂ ਪਹਿਲਾਂ, ਉਸਨੂੰ ਪਿਛਲੇ ਮੈਚ ਵਿੱਚ ਪੰਜਾਬ ਕਿੰਗਜ਼ ਤੋਂ ਹਾਰ ਮਿਲੀ ਸੀ।
Read More: PBKS ਬਨਾਮ RCB: ਵਿਰਾਟ ਕੋਹਲੀ ਨੇ ਤੋੜਿਆ ਡੇਵਿਡ ਵਾਰਨਰ ਦਾ ਰਿਕਾਰਡ, ਔਰੇਂਜ ਕੈਪ ਦੀ ਦੌੜ 'ਚ ਹੋਏ ਸ਼ਾਮਲ
GT Vs KKR Kolkata Knight Riders Suffer Second Consecutive Defeat In IPL 2025
