April 23, 2025
ਲਖਨਊ 23 ਅਪ੍ਰੈਲ 2025: ਦਿੱਲੀ ਕੈਪੀਟਲਜ਼ ਨੇ ਕੇਐਲ ਰਾਹੁਲ ਅਤੇ ਅਭਿਸ਼ੇਕ ਪੋਰੇਲ ਦੇ ਅਰਧ ਸੈਂਕੜਿਆਂ ਦੀ ਬਦੌਲਤ ਲਖਨਊ ਸੁਪਰ ਜਾਇੰਟਸ ਨੂੰ ਅੱਠ ਵਿਕਟਾਂ ਨਾਲ ਹਰਾਇਆ। ਏਕਾਨਾ ਸਟੇਡੀਅਮ 'ਚ ਖੇਡੇ ਗਏ ਮੈਚ 'ਚ ਲਖਨਊ ਨੇ ਏਡਨ ਮਾਰਕਰਾਮ ਦੇ ਅਰਧ ਸੈਂਕੜੇ ਦੇ ਆਧਾਰ 'ਤੇ 20 ਓਵਰਾਂ 'ਚ 6 ਵਿਕਟਾਂ 'ਤੇ 159 ਦੌੜਾਂ ਬਣਾਈਆਂ, ਜਵਾਬ 'ਚ ਦਿੱਲੀ ਨੇ 17.5 ਓਵਰਾਂ 'ਚ 2 ਵਿਕਟਾਂ 'ਤੇ 161 ਦੌੜਾਂ ਬਣਾ ਕੇ ਮੈਚ ਜਿੱਤ ਲਿਆ। ਇਹ ਦਿੱਲੀ ਦੀ ਅੱਠ ਮੈਚਾਂ 'ਚ ਛੇਵੀਂ ਜਿੱਤ ਹੈ। ਇਹ ਇੱਕ ਸੀਜ਼ਨ 'ਚ ਪੰਜਵਾਂ ਮੌਕਾ ਹੈ ਜਦੋਂ ਦਿੱਲੀ ਨੇ ਪਹਿਲੇ ਅੱਠ ਮੈਚਾਂ 'ਚੋਂ ਛੇ ਜਿੱਤੇ ਹਨ।
ਆਈਪੀਐਲ 2025 ਤੋਂ ਪਹਿਲਾਂ, ਦਿੱਲੀ ਨੇ 2009, 2012, 2020 ਅਤੇ 2021 ਸੀਜ਼ਨਾਂ 'ਚ ਵੀ ਪਹਿਲੇ ਅੱਠ 'ਚੋਂ ਛੇ ਮੈਚ ਜਿੱਤੇ ਸਨ। ਦਿਲਚਸਪ ਗੱਲ ਇਹ ਹੈ ਕਿ ਜਦੋਂ ਵੀ ਦਿੱਲੀ ਨੇ ਅਜਿਹਾ ਕੀਤਾ ਹੈ, ਉਹ ਪਲੇਆਫ ਵਿੱਚ ਪਹੁੰਚਣ ਵਿੱਚ ਸਫਲ ਰਿਹਾ ਹੈ। ਇਸ ਜਿੱਤ ਨਾਲ ਦਿੱਲੀ ਦੇ 12 ਅੰਕ ਹੋ ਗਏ ਹਨ ਅਤੇ ਉਹ ਅੰਕ ਸੂਚੀ'ਚ ਗੁਜਰਾਤ ਟਾਈਟਨਜ਼ ਤੋਂ ਬਾਅਦ ਦੂਜੇ ਸਥਾਨ 'ਤੇ ਹੈ। ਦਿੱਲੀ ਅਤੇ ਗੁਜਰਾਤ ਦੇ ਬਰਾਬਰ ਅੰਕ ਹਨ, ਪਰ ਨੈੱਟ ਰਨ ਰੇਟ ਦੇ ਆਧਾਰ 'ਤੇ ਟਾਈਟਨਸ ਸਿਖਰ 'ਤੇ ਬਣਿਆ ਹੋਇਆ ਹੈ। ਦੂਜੇ ਪਾਸੇ, ਲਖਨਊ ਦੇ ਨੌਂ ਮੈਚਾਂ 'ਚ ਪੰਜ ਜਿੱਤਾਂ ਅਤੇ ਚਾਰ ਹਾਰਾਂ ਨਾਲ 10 ਅੰਕ ਹਨ ਅਤੇ ਉਹ ਟੇਬਲ ਵਿੱਚ ਪੰਜਵੇਂ ਸਥਾਨ 'ਤੇ ਹੈ।
ਇਸ ਦੇ ਨਾਲ ਹੀ ਕੇਐਲ ਰਾਹੁਲ ਨੇ ਆਈਪੀਐਲ 'ਚ 5000 ਦੌੜਾਂ ਵੀ ਪੂਰੀਆਂ ਕਰ ਲਈਆਂ। ਉਹ ਸਭ ਤੋਂ ਘੱਟ ਪਾਰੀਆਂ 'ਚ ਅਜਿਹਾ ਕਰਨ ਵਾਲਾ ਬੱਲੇਬਾਜ਼ ਬਣ ਗਿਆ ਹੈ। ਰਾਹੁਲ ਨੇ 130 ਪਾਰੀਆਂ 'ਚ ਇਹ ਉਪਲਬਧੀ ਹਾਸਲ ਕੀਤੀ, ਡੇਵਿਡ ਵਾਰਨਰ ਨੂੰ ਪਛਾੜ ਦਿੱਤਾ। ਵਾਰਨਰ ਨੇ ਆਈਪੀਐਲ 'ਚ 135 ਪਾਰੀਆਂ 'ਚ 5000 ਦੌੜਾਂ ਪੂਰੀਆਂ ਕੀਤੀਆਂ। ਸੂਚੀ 'ਚ ਤੀਜੇ ਸਥਾਨ 'ਤੇ ਵਿਰਾਟ ਕੋਹਲੀ ਹਨ ਜਿਨ੍ਹਾਂ ਨੇ 157 ਪਾਰੀਆਂ 'ਚ ਇਹ ਉਪਲਬਧੀ ਹਾਸਲ ਕੀਤੀ, ਜਦੋਂ ਕਿ ਏਬੀ ਡਿਵਿਲੀਅਰਜ਼ 161 ਪਾਰੀਆਂ ਨਾਲ ਅਤੇ ਸ਼ਿਖਰ ਧਵਨ 168 ਪਾਰੀਆਂ ਨਾਲ ਕ੍ਰਮਵਾਰ ਚੌਥੇ ਅਤੇ ਪੰਜਵੇਂ ਸਥਾਨ 'ਤੇ ਹਨ।
Read More: LSG vs DC: ਲਖਨਊ ਸੁਪਰਜਾਇੰਟਸ ਨੇ ਦਿੱਲੀ ਕੈਪੀਟਲਜ਼ ਨੂੰ ਦਿੱਤਾ 160 ਦੌੜਾਂ ਦਾ ਟੀਚਾ
LSG Vs DC Lucknow Supergiants Lose To Delhi Capitals By Eight Wickets
