February 17, 2026
Bangladeshਬੰਗਲਾਦੇਸ਼ 'ਚ ਤਾਰਿਕ ਰਹਿਮਾਨ ਅੱਜ ਲੈਣਗੇ ਪ੍ਰਧਾਨ ਮੰਤਰੀ ਵਜੋਂ ਸਹੁੰ
ਢਾਕਾ, 17 ਫਰਵਰੀ 2026: ਬੰਗਲਾਦੇਸ਼ ਦੇ ਸਿਆਸੀ ਇਤਿਹਾਸ ਵਿੱਚ ਅੱਜ ਇੱਕ ਨਵਾਂ ਅਧਿਆਏ ਜੁੜਨ ਜਾ ਰਿਹਾ ਹੈ। ਹਾਲ ਹੀ ਵਿੱਚ ਹੋਈਆਂ ਆਮ ਚੋਣਾਂ ਵਿੱਚ ਮਿਲੀ ਵੱਡੀ ਜਿੱਤ ਤੋਂ ਬਾਅਦ, ਬੰਗਲਾਦੇਸ਼ ਨੈਸ਼ਨਲਿਸਟ ਪਾਰਟੀ (BNP) ਦੇ ਆਗੂ ਤਾਰਿਕ ਰਹਿਮਾਨ ਅੱਜ ਦੇਸ਼ ਦੇ ਨਵੇਂ ਪ੍ਰਧਾਨ ਮੰਤਰੀ ਵਜੋਂ ਸਹੁੰ ਚੁੱਕਣਗੇ। ਇਸ ਦੇ ਨਾਲ ਹੀ ਦੇਸ਼ ਵਿੱਚ ਪਿਛਲੇ 20 ਸਾਲਾਂ ਤੋਂ ਚੱਲ ਰਿਹਾ ਬੀ.ਐੱਨ.ਪੀ. ਦੀ ਸੱਤਾ ਦਾ ਸੋਕਾ ਖਤਮ ਹੋ ਜਾਵੇਗਾ ਅਤੇ ਮੁਹੰਮਦ ਯੂਨਸ ਦੀ ਅਗਵਾਈ ਵਾਲੀ ਅੰਤਰਿਮ ਸਰਕਾਰ ਦਾ 18 ਮਹੀਨਿਆਂ ਦਾ ਸ਼ਾਸਨ ਸਮਾਪਤ ਹੋ ਜਾਵੇਗਾ।
ਸਹੁੰ ਚੁੱਕ ਸਮਾਗਮ ਦਾ ਸ਼ਡਿਊਲ:
ਸਵੇਰੇ 10:00 ਵਜੇ: ਨਵੇਂ ਚੁਣੇ ਗਏ ਸੰਸਦ ਮੈਂਬਰਾਂ ਨੂੰ ਸਹੁੰ ਚੁੱਕਾਈ ਜਾਵੇਗੀ।
ਸਵੇਰੇ 11:30 ਵਜੇ: BNP ਸੰਸਦੀ ਦਲ ਦੀ ਬੈਠਕ ਹੋਵੇਗੀ, ਜਿਸ ਵਿੱਚ ਰਸਮੀ ਤੌਰ 'ਤੇ ਤਾਰਿਕ ਰਹਿਮਾਨ ਨੂੰ ਆਪਣਾ ਨੇਤਾ ਚੁਣਿਆ ਜਾਵੇਗਾ।
ਸ਼ਾਮ 04:00 ਵਜੇ: ਸੰਸਦ ਕੰਪਲੈਕਸ ਦੇ ਸਾਊਥ ਪਲਾਜ਼ਾ ਵਿੱਚ ਸਹੁੰ ਚੁੱਕ ਸਮਾਗਮ ਹੋਵੇਗਾ, ਜਿੱਥੇ ਰਾਸ਼ਟਰਪਤੀ ਮੁਹੰਮਦ ਸ਼ਹਾਬੂਦੀਨ ਤਾਰਿਕ ਰਹਿਮਾਨ ਅਤੇ ਉਨ੍ਹਾਂ ਦੀ ਕੈਬਨਿਟ ਨੂੰ ਸਹੁੰ ਚੁੱਕਾਉਣਗੇ।
ਲੰਡਨ ਤੋਂ ਪ੍ਰਧਾਨ ਮੰਤਰੀ ਦੀ ਕੁਰਸੀ ਤੱਕ
60 ਸਾਲਾ ਤਾਰਿਕ ਰਹਿਮਾਨ ਸਾਬਕਾ ਪ੍ਰਧਾਨ ਮੰਤਰੀ ਖਾਲਿਦਾ ਜ਼ੀਆ ਦੇ ਪੁੱਤਰ ਹਨ। ਉਹ ਕਰੀਬ 18 ਸਾਲ ਲੰਡਨ ਵਿੱਚ ਰਹਿਣ ਤੋਂ ਬਾਅਦ ਪਿਛਲੇ ਸਾਲ ਦਸੰਬਰ ਵਿੱਚ ਸਵਦੇਸ਼ ਪਰਤੇ ਸਨ। 30 ਦਸੰਬਰ ਨੂੰ ਆਪਣੀ ਮਾਤਾ ਦੇ ਦਿਹਾਂਤ ਤੋਂ ਬਾਅਦ ਉਨ੍ਹਾਂ ਨੇ ਪਾਰਟੀ ਦੀ ਵਾਗਡੋਰ ਸੰਭਾਲੀ ਸੀ।
ਭਾਰਤ ਵੱਲੋਂ ਓਮ ਬਿਰਲਾ ਹੋਣਗੇ ਸ਼ਾਮਲ
ਇਸ ਇਤਿਹਾਸਕ ਮੌਕੇ 'ਤੇ ਭਾਰਤ ਦੀ ਨੁਮਾਇੰਦਗੀ ਲੋਕ ਸਭਾ ਸਪੀਕਰ ਓਮ ਬਿਰਲਾ ਕਰਨਗੇ। ਉਨ੍ਹਾਂ ਦੇ ਨਾਲ ਵਿਦੇਸ਼ ਸਕੱਤਰ ਵਿਕਰਮ ਮਿਸਰੀ ਵੀ ਢਾਕਾ ਪਹੁੰਚ ਰਹੇ ਹਨ। ਭਾਰਤ ਦੀ ਇਸ ਉੱਚ ਪੱਧਰੀ ਸ਼ਮੂਲੀਅਤ ਨੂੰ ਦੋਵਾਂ ਦੇਸ਼ਾਂ ਦੇ ਭਵਿੱਖੀ ਸਬੰਧਾਂ ਲਈ ਬਹੁਤ ਅਹਿਮ ਮੰਨਿਆ ਜਾ ਰਿਹਾ ਹੈ।
ਹਿੰਦੂ ਤੇ ਘੱਟ ਗਿਣਤੀ ਚਿਹਰਿਆਂ ਦੀ ਜਿੱਤ
ਇਸ ਵਾਰ ਚੋਣਾਂ ਵਿੱਚ ਚਾਰ ਘੱਟ ਗਿਣਤੀ ਮੈਂਬਰ ਵੀ ਜਿੱਤ ਕੇ ਸੰਸਦ ਪਹੁੰਚੇ ਹਨ। ਇਨ੍ਹਾਂ ਵਿੱਚ ਦੋ ਹਿੰਦੂ ਆਗੂ—ਗਾਇਸ਼ਵਰ ਚੰਦਰ ਰਾਏ ਅਤੇ ਨਿਤਾਈ ਰਾਏ ਚੌਧਰੀ ਸ਼ਾਮਲ ਹਨ, ਜਿਨ੍ਹਾਂ ਨੇ BNP ਦੀ ਟਿਕਟ 'ਤੇ ਜਮਾਤ-ਏ-ਇਸਲਾਮੀ ਦੇ ਉਮੀਦਵਾਰਾਂ ਨੂੰ ਹਰਾਇਆ ਹੈ। ਇਨ੍ਹਾਂ ਤੋਂ ਇਲਾਵਾ ਬੌਧ ਧਰਮ ਦੇ ਸਚਿੰਗ ਪ੍ਰੂ ਅਤੇ ਦੀਪੇਨ ਦੀਵਾਨ ਵੀ ਸੰਸਦ ਮੈਂਬਰ ਚੁਣੇ ਗਏ ਹਨ।
Tariq Rahman To Take Oath As Prime Minister Of Bangladesh Today
