Canada ਵਿੱਚ Kapil Sharma ਦੇ ਕੈਫੇ 'ਤੇ ਫਾਇਰਿੰਗ ਕਰਵਾਉਣ ਵਾਲਾਸਾਜ਼ਿਸ਼ਕਾਰ ਗ੍ਰਿਫ਼ਤਾਰ

ਨਵੀਂ ਦਿੱਲੀ, 28 ਨਵੰਬਰ 2025: ਦਿੱਲੀ ਪੁਲਿਸ ਕ੍ਰਾਈਮ ਬ੍ਰਾਂਚ ਨੂੰ ਕੈਨੇਡਾ ਵਿੱਚ ਮਸ਼ਹੂਰ ਕਾਮੇਡੀਅਨ ਕਪਿਲ ਸ਼ਰਮਾ ਦੇ 'ਕੈਪਸ ਕੈਫੇ' (KAP's Cafe) 'ਤੇ ਹੋਈ ਫਾਇਰਿੰਗ ਮਾਮਲੇ ਵਿੱਚ ਇੱਕ ਵੱਡੀ ਕਾਮਯਾਬੀ ਮਿਲੀ ਹੈ। ਪੁਲਿਸ ਨੇ ਇਸ ਕੇਸ ਦੇ ਮੁੱਖ ਸਾਜ਼ਿਸ਼ਕਾਰ ਬੰਧੂ ਮਾਨ ਸਿੰਘ ਸੇਖੋਂ ਨੂੰ ਦਿੱਲੀ ਤੋਂ ਗਿਰਫ਼ਤਾਰ ਕਰ ਲਿਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਉਹ ਗੋਲਡੀ ਢਿੱਲੋਂ ਗੈਂਗ ਦਾ ਇੱਕ ਅਹਿਮ ਕਿਰਦਾਰ ਹੈ ਅਤੇ ਭਾਰਤ–ਕੈਨੇਡਾ ਗੈਂਗਸਟਰ ਨੈਟਵਰਕ ਦੀ ਕੜੀ ਵਜੋਂ ਕੰਮ ਕਰਦਾ ਸੀ।

ਕ੍ਰਾਈਮ ਬ੍ਰਾਂਚ ਨੂੰ ਖੁਫੀਆ ਜਾਣਕਾਰੀ ਮਿਲੀ ਸੀ ਕਿ ਸੇਖੋਂ ਹਮਲੇ ਤੋਂ ਬਾਅਦ ਚੁੱਪ-ਚਾਪ ਭਾਰਤ ਵਾਪਸ ਆ ਗਿਆ ਹੈ ਅਤੇ ਦਿੱਲੀ ਵਿੱਚ ਲੁਕਿਆ ਹੋਇਆ ਹੈ। ਰੇਡ ਦੌਰਾਨ ਉਸਨੂੰ ਕਾਬੂ ਕਰ ਲਿਆ ਗਿਆ।

ਚਾਈਨੀਜ਼ ਹਾਈ-ਟੈਕ ਪਿਸਤੌਲ ਅਤੇ ਕਾਰਤੂਸ ਬਰਾਮਦ

ਗ੍ਰਿਫ਼ਤਾਰੀ ਸਮੇਂ ਸੇਖੋਂ ਕੋਲੋਂ ਇੱਕ ‘Made in China’ PX-3 ਪਿਸਤੌਲ ਅਤੇ 8 ਜ਼ਿੰਦਾ ਕਾਰਤੂਸ ਬਰਾਮਦ ਕੀਤੇ ਗਏ ਹਨ। ਪੁਲਿਸ ਅਨੁਸਾਰ, ਉਹ ਕਈ ਅਪਰਾਧਿਕ ਗਤੀਵਿਧੀਆਂ — ਜਿਵੇਂ ਕਿ ਹਮਲਿਆਂ ਦੀ ਯੋਜਨਾ, ਜਬਰਨ ਵਸੂਲੀ ਅਤੇ ਧਮਕੀਆਂ — ਵਿੱਚ ਲੰਬੇ ਸਮੇਂ ਤੋਂ ਐਕਟਿਵ ਸੀ।

ਤਿੰਨ ਮਹੀਨਿਆਂ ਵਿੱਚ ਤਿੰਨ ਵਾਰ ਕੈਫੇ 'ਤੇ ਹਮਲਾ

ਕੈਨੇਡਾ ਸਥਿਤ ਇਸ ਕੈਫੇ 'ਤੇ ਪਿਛਲੇ ਕੁਝ ਮਹੀਨਿਆਂ ਵਿੱਚ ਤਿੰਨ ਵਾਰ ਫਾਇਰਿੰਗ ਹੋ ਚੁੱਕੀ ਹੈ:

1.10 ਜੁਲਾਈ: ਪਹਿਲੀ ਗੋਲੀਬਾਰੀ ਵਿੱਚ 9 ਰਾਊਂਡ ਚਲਾਏ ਗਏ ਸਨ, ਜਿਸਦੀ ਜ਼ਿੰਮੇਵਾਰੀ ਹਰਜੀਤ ਸਿੰਘ ਲਾਡੀ ਨੇ ਲਈ ਸੀ।
2.7 ਅਗਸਤ: ਦੂਜੇ ਹਮਲੇ ਵਿੱਚ ਖਿੜਕੀਆਂ 'ਤੇ 6 ਗੋਲੀਆਂ ਦੇ ਨਿਸ਼ਾਨ ਮਿਲੇ।
3. 18 ਅਕਤੂਬਰ: ਤੀਜੇ ਹਮਲੇ ਬਾਅਦ ਗੋਲਡੀ ਢਿੱਲੋਂ ਅਤੇ ਕੁਲਵੀਰ ਸਿੱਧੂ ਨੇਪਾਲੀ ਨੇ ਸੋਸ਼ਲ ਮੀਡੀਆ 'ਤੇ ਜ਼ਿੰਮੇਵਾਰੀ ਦਾ ਦਾਅਵਾ ਕੀਤਾ ਸੀ।

ਇਹ ਤਿੰਨੋ ਘਟਨਾਵਾਂ ਕੈਨੇਡਾ ਪੁਲਿਸ ਲਈ ਵੀ ਵੱਡੀ ਚੁਣੌਤੀ ਬਣੀਆਂ ਹੋਈਆਂ ਸਨ।

ਸਿੰਡੀਕੇਟ ਦੀ ਨੈੱਟਵਰਕਿੰਗ ਦੀ ਹੋਵੇਗੀ ਡੂੰਘੀ ਜਾਂਚ

ਦਿੱਲੀ ਪੁਲਿਸ ਦਾ ਮੰਨਣਾ ਹੈ ਕਿ ਸੇਖੋਂ ਦੀ ਗ੍ਰਿਫ਼ਤਾਰੀ ਨਾਲ ਗੋਲਡੀ ਢਿੱਲੋਂ ਗੈਂਗ ਦੇ ਅੰਤਰਰਾਸ਼ਟਰੀ ਨੈੱਟਵਰਕ ਨੂੰ ਸਮਝਣ ਵਿੱਚ ਵੱਡੀ ਮਦਦ ਮਿਲੇਗੀ। ਹੁਣ ਜਾਂਚ ਫੰਡਿੰਗ ਰੂਟ, ਹਥਿਆਰ ਸਪਲਾਈ ਚੈਨ ਅਤੇ ਭਾਰਤ–ਕੈਨੇਡਾ ਗੈਂਗਸਟਰ ਗਠਜੋੜ ਦੇ ਹੋਰ ਮੈਂਬਰਾਂ 'ਤੇ ਕੇਂਦ੍ਰਿਤ ਰਹੇਗੀ।

ਪੁਲਿਸ ਉਮੀਦ ਕਰ ਰਹੀ ਹੈ ਕਿ ਸੇਖੋਂ ਤੋਂ ਮਿਲਣ ਵਾਲੀ ਜਾਂਚੀ ਜਾਣਕਾਰੀ ਨਾਲ ਇਸ ਸਿੰਡੀਕੇਟ ਦੀਆਂ ਹੋਰ ਕੜੀਆਂ ਤੋੜੀਆਂ ਜਾ ਸਕਣਗੀਆਂ।