ਸਾਲ2017 ਵਿਚ ਮੁਹਾਲੀ ਦੇ ਫੇਜ਼-3ਬੀ1 ਵਿਚ ਵਾਪਰੇ ਇਕ ਦਿਲ ਦਹਿਲਾ ਦੇਣ ਵਾਲੇ ਹੱਤਿਆ ਕਾਂਡ ਵਿਚ ਜ਼ਿਲ੍ਹਾ ਅਦਾਲਤ ਨੇ ਅਹਿਮ ਫ਼ੈਸਲਾ ਸੁਣਾਉਂਦਿਆਂ ਮ੍ਰਿਤਕ ਏਕਮ ਢਿੱਲੋਂ ਦੀ ਪਤਨੀ ਸੀਰਤ ਕੌਰ ਨੂੰ ਦੋਸ਼ੀ ਕਰਾਰ ਦੇ ਕੇ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ। ਅਦਾਲਤ ਨੇ ਦੋਸ਼ੀ'ਤੇ ਜੁਰਮਾਨਾ ਵੀ ਲਗਾਇਆ ਹੈ।

ਪ੍ਰਾਪਤ ਜਾਣਕਾਰੀ ਅਨੁਸਾਰ ਸੀਰਤ ਕੌਰ'ਤੇ ਦੋਸ਼ ਹੈ ਕਿ ਉਸ ਨੇ ਆਪਣੇ ਪਤੀ ਏਕਮ ਢਿਲੋਂ ਦੀ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਸੀ। ਘਟਨਾ ਤੋਂ ਬਾਅਦ ਉਸ ਨੇ ਸਬੂਤਾਂ ਨੂੰ ਲੁਕਾਉਣ ਦੀ ਕੋਸ਼ਿਸ਼ ਵੀ ਕੀਤੀ, ਪਰ ਪੁਲਿਸ ਜਾਂਚ ਦੌਰਾਨ ਸੱਚ ਸਾਹਮਣੇ ਆ ਗਿਆ। ਇਸ ਸਨਸਨੀਖੇਜ਼ ਹੱਤਿਆ ਕਾਂਡ ਦਾ ਖੁਲਾਸਾ ਉਸ ਸਮੇਂ ਹੋਇਆ ਜਦੋਂ ਇਕ ਆਟੋ ਰਿਕਸ਼ਾ ਚਾਲਕ ਨੇ ਪੁਲਿਸ ਨੂੰ ਦੱਸਿਆ ਕਿ ਇਕ ਔਰਤ ਨੇ ਉਸ ਤੋਂ ਇਕ ਵੱਡੀ ਟਰਾਲੀ/ਅਟੈਚੀ ਰੱਖਵਾਉਣ ਅਤੇ ਲਿਜਾਣ ਲਈ ਮਦਦ ਮੰਗੀ ਸੀ। ਆਟੋ ਚਾਲਕ ਨੇ ਅਟੈਚੀ ਚੋਂ ਵਗਦੇ ਖੂਨ ਨੂੰ ਦੇਖ ਕੇ ਜਾਣਕਾਰੀ ਪੁਲਿਸ ਨੂੰ ਦਿੱਤੀ, ਜਿਸ ਤੋਂ ਬਾਅਦ ਜਾਂਚ ਨੇ ਨਵਾਂ ਮੋੜ ਲਿਆ ਅਤੇ ਪੁਲਿਸ ਦੋਸ਼ੀ ਤੱਕ ਪਹੁੰਚ ਗਈ।ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਕਿ ਕਰੀਬ6 ਫੁੱਟ3 ਇੰਚ ਲੰਬੇ ਏਕਮ ਢਿੱਲੋਂ ਦੀ ਹੱਤਿਆ ਤੋਂ ਬਾਅਦ ਲਾਸ਼ ਨੂੰ ਠਿਕਾਣੇ ਲਗਾਇਆ ਜਾਣਾ ਸੀ। ਮਾਮਲੇ ਵਿਚ ਇਕੱਠੇ ਕੀਤੇ ਗਏ ਹਾਲਾਤੀ ਸਬੂਤਾਂ, ਗਵਾਹਾਂ ਦੇ ਬਿਆਨਾਂ ਅਤੇ ਫੋਰੈਂਸਿਕ ਰਿਪੋਰਟਾਂ ਦੇ ਆਧਾਰ'ਤੇ ਅਦਾਲਤ ਨੇ ਸੀਰਤ ਕੌਰ ਨੂੰ ਦੋਸ਼ੀ ਮੰਨਦਿਆਂ ਉਮਰ ਕੈਦ ਦੀ ਸਜ਼ਾ ਸੁਣਾਈ। ਇਸ ਫ਼ੈਸਲੇ ਨਾਲ ਕਰੀਬ ਨੌਂ ਸਾਲ ਪੁਰਾਣੇ ਇਸ ਚਰਚਿਤ ਹੱਤਿਆਕਾਂਡ ਦਾ ਕਾਨੂੰਨੀ ਪੱਖ ਤੋਂ ਮੁਹਾਲੀ ਅਦਾਲਤ ਵਿਖੇ ਨਿਪਟਾਰਾ ਹੋ ਗਿਆ ਹੈ।

ਕੀ ਸੀ ਪੂਰਾ ਮਾਮਲਾ?

ਇਹ ਸਨਸਨੀਖੇਜ਼ ਘਟਨਾ19 ਮਾਰਚ2017 ਨੂੰ ਫੇਜ਼-3ਬੀ1, ਮੋਹਾਲੀ ਵਿਖੇ ਵਾਪਰੀ ਸੀ। ਸ਼ਿਕਾਇਤਕਰਤਾ ਦਰਸ਼ਨ ਸਿੰਘ ਢਿੱਲੋਂ (ਮ੍ਰਿਤਕ ਦੇ ਭਰਾ) ਮੁਤਾਬਕ, ਉਨ੍ਹਾਂ ਨੂੰ ਸੂਚਨਾ ਮਿਲੀ ਸੀ ਕਿ ਉਨ੍ਹਾਂ ਦੇ ਭਰਾ ਦੀ ਕਿਰਾਏ ਵਾਲੀ ਕੋਠੀ ਦੇ ਬਾਹਰ ਖੜ੍ਹੀ ਬੀ.ਐਮ.ਡਬਲਯੂ (BMW) ਕਾਰ (CH-04-F-0027) ਕੋਲ ਖੂਨ ਖਿੱਲਰਿਆ ਹੋਇਆ ਹੈ। ਜਦੋਂ ਮੌਕੇ'ਤੇ ਜਾ ਕੇ ਜਾਂਚ ਕੀਤੀ ਗਈ ਤਾਂ ਕਾਰ ਦੀ ਪਿਛਲੀ ਸੀਟ'ਤੇ ਪਏ ਇੱਕ ਕਾਲੇ ਰੰਗ ਦੇ ਸੂਟਕੇਸ ਵਿੱਚੋਂ ਖੂਨ ਟਿਪਕ ਰਿਹਾ ਸੀ। ਸੂਟਕੇਸ ਖੋਲ੍ਹਣ'ਤੇ ਉਸ ਵਿੱਚੋਂ ਏਕਮ ਸਿੰਘ ਢਿੱਲੋਂ ਦੀ ਲਾਸ਼ ਬਰਾਮਦ ਹੋਈ, ਜਿਸ ਦੇ ਸਿਰ'ਤੇ ਗੋਲੀ ਮਾਰੀ ਗਈ ਸੀ।

ਪੁਲਿਸ ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ ਸੀਰਤ ਕੌਰ ਦੇ ਕਿਸੇ ਹੋਰ ਵਿਅਕਤੀ ਨਾਲ ਨਜਾਇਜ਼ ਸੰਬੰਧ ਸਨ ਅਤੇ ਜਾਇਦਾਦ ਨੂੰ ਹੜੱਪਣ ਦੀ ਨੀਅਤ ਨਾਲ ਉਸਨੇ ਆਪਣੇ ਪਰਿਵਾਰਕ ਮੈਂਬਰਾਂ ਨਾਲ ਮਿਲ ਕੇ ਇਸ ਕਤਲ ਦੀ ਸਾਜ਼ਿਸ਼ ਰਚੀ ਸੀ। ਕਤਲ ਤੋਂ ਬਾਅਦ ਲਾਸ਼ ਨੂੰ ਖੁਰਦ-ਬੁਰਦ ਕਰਨ ਲਈ ਸੂਟਕੇਸ ਵਿੱਚ ਪੈਕ ਕਰਕੇ ਕਾਰ ਵਿੱਚ ਰੱਖਿਆ ਗਿਆ ਸੀ।

ਸਰਕਾਰੀ ਪੱਖ ਵੱਲੋਂ ਅਦਾਲਤ ਵਿੱਚ ਕਈ ਅਹਿਮ ਸਬੂਤ ਪੇਸ਼ ਕੀਤੇ ਗਏ, ਜਿਨ੍ਹਾਂ ਨੇ ਕੜੀ ਨਾਲ ਕੜੀ ਜੋੜ ਕੇ ਸੀਰਤ ਦੇ ਗੁਨਾਹ ਨੂੰ ਸਾਬਤ ਕੀਤਾ

ਮਾਸੂਮ ਪੁੱਤਰ ਦੀ ਗਵਾਹੀ ਸਭ ਤੋਂ ਅਹਿਮ: ਮ੍ਰਿਤਕ ਦੇ11 ਸਾਲਾ ਪੁੱਤਰ ਗੁਰਨਿਵਾਜ਼ ਸਿੰਘ ਨੇ ਅਦਾਲਤ ਵਿੱਚ ਬਿਆਨ ਦਿੱਤਾ ਕਿ ਘਟਨਾ ਵਾਲੀ ਰਾਤ ਉਸਦੇ ਮਾਤਾ-ਪਿਤਾ ਵਿਚਕਾਰ ਝਗੜਾ ਹੋਇਆ ਸੀ। ਉਸਨੇ ਆਪਣੀ ਮਾਂ ਨੂੰ ਸੇਫ਼ (ਤਿਜੋਰੀ) ਵਿੱਚੋਂ ਪਿਸਤੌਲ ਕੱਢਦੇ ਦੇਖਿਆ ਸੀ। ਰਾਤ ਨੂੰ ਉਸਨੇ ਪਿਤਾ ਦੇ ਚੀਕਣ ਅਤੇ ਗੋਲੀ ਚੱਲਣ ਦੀ ਆਵਾਜ਼ ਸੁਣੀ, ਪਰ ਉਸਦਾ ਕਮਰਾ ਬਾਹਰੋਂ ਬੰਦ ਸੀ। ਅਗਲੀ ਸਵੇਰ ਉਸਦੀ ਮਾਂ ਅਤੇ ਪੱਪੀ ਮਾਸੀ ਘਰ ਦੀ ਸਫਾਈ (ਖੂਨ ਸਾਫ਼) ਕਰ ਰਹੇ ਸਨ।

ਸੀਸੀਟੀਵੀ (CCTV) ਫੁਟੇਜ

ਗੁਆਂਢੀ ਦੇ ਘਰ ਲੱਗੇ ਕੈਮਰਿਆਂ ਦੀ ਫੁਟੇਜ ਵਿੱਚ ਸੀਰਤ ਕੌਰ ਸਵੇਰੇ ਕੋਠੀ ਦੀਆਂ ਪੌੜੀਆਂ ਤੋਂ ਭਾਰੀ ਸੂਟਕੇਸ ਘਸੀਟ ਕੇ ਹੇਠਾਂ ਲਿਆਉਂਦੀ ਅਤੇ ਪੌੜੀਆਂ'ਤੇ ਪੋਚਾ ਲਗਾ ਕੇ ਸਾਫ਼ ਕਰਦੀ ਸਾਫ਼ ਦਿਖਾਈ ਦਿੱਤੀ।

ਘਟਨਾ ਤੋਂ ਬਾਅਦ ਦਾ ਸ਼ੱਕੀ ਵਿਵਹਾਰ

ਕਤਲ ਤੋਂ ਤੁਰੰਤ ਬਾਅਦ ਸੀਰਤ ਨੇ ਮਾਰਕੀਟ ਜਾ ਕੇ ਕ੍ਰੈਡਿਟ ਕਾਰਡ ਰਾਹੀਂ ਨਵਾਂ ਫੋਨ ਖਰੀਦਿਆ ਅਤੇ ਸੈਲੂਨ ਵਿੱਚ ਜਾ ਕੇ ਹੇਅਰ ਵਾਸ਼ ਕਰਵਾਇਆ, ਜਿੱਥੇ ਉਸ ਨੇ ਕਰਮਚਾਰੀਆਂ ਦੇ ਫੋਨ ਵਰਤ ਕੇ ਆਪਣੀ ਮਾਂ ਨੂੰ ਫੋਨ ਕਰਕੇ ਬੱਚੇ ਅਤੇ ਸਮਾਨ ਲੈ ਜਾਣ ਲਈ ਕਿਹਾ। ਜਾਂਚ ਦੌਰਾਨ ਉਸਨੇ ਪੋਲੀਗ੍ਰਾਫੀ/ਨਾਰਕੋ ਟੈਸਟ ਕਰਵਾਉਣ ਤੋਂ ਵੀ ਇਨਕਾਰ ਕਰ ਦਿੱਤਾ ਸੀ।

ਹਥਿਆਰ ਦੀ ਬਰਾਮਦਗੀ

ਪੁਲਿਸ ਨੇ ਸੀਰਤ ਦੀ ਨਿਸ਼ਾਨਦੇਹੀ'ਤੇ ਘਰ ਦੀ ਅਲਮਾਰੀ ਵਿੱਚੋਂ ਅਮਰੀਕਾ ਮਾਰਕਾ7.65 ਐਮਐਮ ਪਿਸਤੌਲ ਅਤੇ ਰਸੋਈ ਦੇ ਡੱਬੇ ਵਿੱਚੋਂ ਲੁਕਾਈ ਹੋਈ ਮੈਗਜ਼ੀਨ ਬਰਾਮਦ ਕੀਤੀ ਸੀ।

ਬਚਾਅ ਪੱਖ ਦੇ ਵਕੀਲਾਂ ਨੇ ਦਲੀਲ ਦਿੱਤੀ ਸੀ ਕਿ ਏਕਮ ਸਿੰਘ ਢਿੱਲੋਂ ਨੇ ਮਾਨਸਿਕ ਪਰੇਸ਼ਾਨੀ ਕਾਰਨ ਖੁਦਕੁਸ਼ੀ ਕੀਤੀ ਹੈ ਅਤੇ ਸੀਰਤ ਦੀ ਘੱਟ ਹਾਈਟ (5'3") ਕਾਰਨ6'3" ਲੰਬੇ ਏਕਮ ਨੂੰ ਗੋਲੀ ਮਾਰਨਾ ਸੰਭਵ ਨਹੀਂ ਸੀ। ਪਰ ਅਦਾਲਤ ਨੇ ਮੈਡੀਕਲ ਅਤੇ ਬੈਲਿਸਟਿਕ ਰਿਪੋਰਟਾਂ (ਜਿੱਥੇ ਹੱਥਾਂ'ਤੇ ਗਨਪਾਊਡਰ ਨਹੀਂ ਮਿਲਿਆ) ਦੇ ਅਧਾਰ'ਤੇ ਖੁਦਕੁਸ਼ੀ ਦੀ ਥਿਊਰੀ ਨੂੰ ਪੂਰੀ ਤਰ੍ਹਾਂ ਨਕਾਰ ਦਿੱਤਾ ਅਤੇ ਇਸ ਨੂੰ ਸਰਾਸਰ ਹੱਤਿਆ ਕਰਾਰ ਦਿੰਦਿਆਂ ਸੀਰਤ ਕੌਰ ਨੂੰ ਉਮਰ ਕੈਦ ਦੀ ਸਖ਼ਤ ਸਜ਼ਾ ਸੁਣਾਈ।