ਅਮਰੀਕਾ 'ਚ ਪੰਜਾਬੀ ਟਰੱਕ ਡਰਾਈਵਰ ਜਸ਼ਨਪ੍ਰੀਤ ਸਿੰਘ ਦੇ ਕੇਸ 'ਚ ਵੱਡਾ ਮੋੜ — ਮੈਡੀਕਲ ਰਿਪੋਰਟ ਨੇ ਬਦਲੀ ਪੂਰੀ ਤਸਵੀਰ

ਵਾਸ਼ਿੰਗਟਨ/ਗੁਰਦਾਸਪੁਰ, 4 ਨਵੰਬਰ 2025ਕੈਲੀਫੋਰਨੀਆ ਵਿੱਚ ਪਿਛਲੇ ਮਹੀਨੇ ਹੋਏ ਦਹਿਲਾ ਦੇਣ ਵਾਲੇ ਸੜਕ ਹਾਦਸੇ ਨਾਲ ਜੁੜੇ ਕੇਸ ਵਿੱਚ ਵੱਡਾ ਪਲਟਾਅ ਆ ਗਿਆ ਹੈ। ਦੱਸ ਦਈਏ ਕਿ ਇਸ ਕੇਸ 'ਚ ਜਿਸ 21 ਸਾਲਾ ਪੰਜਾਬੀ ਟਰੱਕ ਡਰਾਈਵਰ ਜਸ਼ਨਪ੍ਰੀਤ ਸਿੰਘ ਨੂੰ 3 ਲੋਕਾਂ ਦੀ ਮੌਤ ਦੇ ਮਾਮਲੇ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ, ਉਸ ਦੀ ਮੈਡੀਕਲ ਜਾਂਚ ਰਿਪੋਰਟ ਆ ਗਈ ਹੈ — ਜੋ ਪੂਰੇ ਕੇਸ ਨੂੰ ਇਕ ਨਵੀਂ ਦਿਸ਼ਾ ਦੇ ਰਹੀ ਹੈ।

ਰਿਪੋਰਟ ਅਨੁਸਾਰ, ਹਾਦਸੇ ਦੇ ਸਮੇਂ ਜਸ਼ਨਪ੍ਰੀਤ ਸਿੰਘ ਦੇ ਸ਼ਰੀਰ 'ਚ ਨਾ ਤਾਂ ਸ਼ਰਾਬ (alcohol) ਸੀ ਅਤੇ ਨਾ ਹੀ ਕਿਸੇ ਨਸ਼ੀਲੇ ਪਦਾਰਥ (drugs) ਦੀ ਮੌਜੂਦਗੀ ਪਾਈ ਗਈ। ਇਹ ਖੁਲਾਸਾ ਉਸਦੇ ਮਾਪਿਆਂ ਦੇ ਉਸ ਦਾਅਵੇ ਨੂੰ ਸਹੀ ਸਾਬਤ ਕਰਦਾ ਹੈ ਜਿਨ੍ਹਾਂ ਕਿਹਾ ਸੀ ਕਿ ਉਨ੍ਹਾਂ ਦਾ ਪੁੱਤਰ ਅੰਮ੍ਰਿਤਧਾਰੀ ਸਿੱਖ ਹੈ ਅਤੇ ਕਿਸੇ ਵੀ ਤਰ੍ਹਾਂ ਦਾ ਨਸ਼ਾ ਨਹੀਂ ਕਰਦਾ।

ਨਸ਼ੇ ਨਾਲ ਸਬੰਧਤ ਦੋਸ਼ ਹਟਾਏ ਗਏ
ਇਹ ਹਾਦਸਾ 21 ਅਕਤੂਬਰ ਨੂੰ ਕੈਲੀਫੋਰਨੀਆ ਦੇ ਓਨਟਾਰੀਓ ਇਲਾਕੇ ਵਿੱਚ 10 ਅਤੇ 15 ਫ੍ਰੀਵੇਅ ਦੇ ਇੰਟਰਚੇਂਜ ਨੇੜੇ ਵਾਪਰਿਆ ਸੀ। ਤਿੰਨ ਲੋਕਾਂ ਦੀ ਮੌਤ ਅਤੇ ਕਈ ਜ਼ਖਮੀਆਂ ਵਾਲੇ ਇਸ ਹਾਦਸੇ ਤੋਂ ਬਾਅਦ ਸ਼ੁਰੂਆਤੀ ਜਾਂਚ 'ਚ ਜਸ਼ਨਪ੍ਰੀਤ 'ਤੇ ਨਸ਼ੇ ਵਿੱਚ ਗੱਡੀ ਚਲਾਉਣ (DUI) ਦਾ ਦੋਸ਼ ਲਗਾ ਕੇ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਪਰ ਹੁਣ ਜਦੋਂ ਮੈਡੀਕਲ ਟੈਸਟ ਆਇਆ ਹੈ, ਡਿਸਟ੍ਰਿਕਟ ਅਟਾਰਨੀ ਦੇ ਦਫ਼ਤਰ ਨੇ ਸਪਸ਼ਟ ਕਰ ਦਿੱਤਾ ਕਿ ਉਸਦੇ ਖੂਨ ਵਿੱਚ ਕੋਈ ਵੀ ਇੰਟਾਕਸੀਕੈਂਟ ਨਹੀਂ ਮਿਲਿਆ। ਇਸ ਅਧਾਰ 'ਤੇ, ਨਸ਼ੇ ਨਾਲ ਜੁੜੇ ਸਾਰੇ ਦੋਸ਼ ਉਸ ਖ਼ਿਲਾਫ਼ ਹਟਾ ਦਿੱਤੇ ਗਏ ਹਨ।

‘ਲਾਪਰਵਾਹੀ’ ਨਾਲ ਜੁੜੀ ਕਾਰਵਾਈ ਜਾਰੀ
ਨਸ਼ੇ ਦੇ ਦੋਸ਼ ਹਟਣ ਤੋਂ ਬਾਅਦ ਵੀ ਜਸ਼ਨਪ੍ਰੀਤ ਲਈ ਮੁਕੱਦਮਾ ਪੂਰੀ ਤਰ੍ਹਾਂ ਖਤਮ ਨਹੀਂ ਹੋਇਆ। DA ਦਫ਼ਤਰ ਨੇ ਕਿਹਾ ਹੈ ਕਿ ਮਾਮਲਾ ਹੁਣ ‘ਗਰੋਸਲੀ ਨੈਗਲੀਜੈਂਟ ਹੋਮੀਸਾਈਡ’ (Grossly Negligent Homicide) ਦੇ ਤਹਿਤ ਚੱਲੇਗਾ, ਜਿਸਦਾ ਅਰਥ ਹੈ “ਭਾਰੀ ਲਾਪਰਵਾਹੀ ਕਾਰਨ ਮੌਤ ਦਾ ਕਾਰਣ ਬਣਨਾ”। ਕੈਲੀਫੋਰਨੀਆ ਹਾਈਵੇ ਪੈਟਰੋਲ ਦੇ ਇੱਕ ਅਧਿਕਾਰੀ ਨੇ ਕਿਹਾ ਕਿ ਹਾਦਸਾ ਬਹੁਤ ਭਿਆਨਕ ਸੀ ਅਤੇ ਜੇ ਡਰਾਈਵਰ ਹੋਰ ਧਿਆਨਵਾਨ ਹੁੰਦਾ, ਤਾਂ ਇਸਨੂੰ ਰੋਕਿਆ ਜਾ ਸਕਦਾ ਸੀ।

ਪਰਿਵਾਰ ਨੇ ਮੰਗੀ ਸੀ ਇਨਸਾਫ਼
ਗੁਰਦਾਸਪੁਰ ਦੇ ਨਿਵਾਸੀ ਜਸ਼ਨਪ੍ਰੀਤ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਉਸਦੇ ਪਰਿਵਾਰ ਨੇ ਕਿਹਾ ਸੀ ਕਿ ਉਹ ਬਿਲਕੁਲ ਬੇਕਸੂਰ ਹੈ ਤੇ ਬੇਇਨਸਾਫ਼ੀ ਦਾ ਸ਼ਿਕਾਰ ਬਣ ਰਿਹਾ ਹੈ। ਹੁਣ ਮੈਡੀਕਲ ਰਿਪੋਰਟ ਨਾਲ ਇਹ ਸਾਫ਼ ਹੋ ਗਿਆ ਹੈ ਕਿ ਹਾਦਸਾ ਨਸ਼ੇ ਕਾਰਨ ਨਹੀਂ ਸਗੋਂ ਸੰਭਵ ਤੌਰ 'ਤੇ ਲਾਪਰਵਾਹੀ ਕਾਰਨ ਹੋਇਆ ਸੀ। ਪਰਿਵਾਰ ਨੇ ਉਮੀਦ ਜਤਾਈ ਹੈ ਕਿ ਅਦਾਲਤ ਸੱਚਾਈ ਦੇ ਆਧਾਰ 'ਤੇ ਉਸਦੇ ਪੁੱਤਰ ਨੂੰ ਪੂਰਾ ਇਨਸਾਫ਼ ਦੇਵੇਗੀ।