November 5, 2025
New York ਭਾਰਤੀ ਮੂਲ ਦੇ ਜ਼ੋਹਰਾਨ ਮਮਦਾਨੀ ਬਣੇ ਨਿਊਯਾਰਕ ਦੇ ਨਵੇਂ ਮੇਅਰ, ਡੋਨਾਲਡ ਟਰੰਪ ਨੂੰ ਲੱਗਿਆ ਵੱਡਾ ਝਟਕਾ
ਨਵੀਂ ਦਿੱਲੀ/ਨਿਊਯਾਰਕ, 5 ਨਵੰਬਰ 2025 :ਅਮਰੀਕਾ ਦੇ ਸਭ ਤੋਂ ਮਹੱਤਵਪੂਰਨ ਅਤੇ ਪ੍ਰਭਾਵਸ਼ਾਲੀ ਸ਼ਹਿਰ ਨਿਊਯਾਰਕ ਦੀ ਮੇਅਰ ਚੋਣਾਂ ਵਿੱਚ ਇਸ ਵਾਰ ਇਤਿਹਾਸ ਰਚਿਆ ਗਿਆ ਹੈ। ਭਾਰਤੀ ਮੂਲ ਦੇ ਡੈਮੋਕ੍ਰੈਟ ਉਮੀਦਵਾਰ ਜ਼ੋਹਰਾਨ ਮਮਦਾਨੀ ਨੇ ਜਿੱਤ ਦਰਜ ਕਰਦਿਆਂ ਸ਼ਹਿਰ ਦੇ ਸਭ ਤੋਂ ਨੌਜਵਾਨ ਅਤੇ ਪਹਿਲੇ ਭਾਰਤਵੰਸ਼ੀ ਮੁਸਲਿਮ ਮੇਅਰ ਦਾ ਖ਼ਿਤਾਬ ਹਾਸਲ ਕੀਤਾ ਹੈ।
34 ਸਾਲਾ ਮਮਦਾਨੀ ਨੇ ਸ਼ਹਿਰ ਦੀ ਰਾਜਨੀਤਕ ਦਿਸ਼ਾ ਬਦਲਦਿਆਂ ਆਪਣੇ ਵਿਰੋਧੀਆਂ ਨੂੰ ਵੱਡੇ ਅੰਤਰ ਨਾਲ ਮਾਤ ਦਿੱਤੀ। ਇਹ ਜਿੱਤ ਰਾਸ਼ਟਰਪਤੀ ਡੋਨਾਲਡ ਟਰੰਪ ਲਈ ਵੀ ਇੱਕ ਰਾਜਨੀਤਕ ਝਟਕਾ ਮੰਨੀ ਜਾ ਰਹੀ ਹੈ, ਕਿਉਂਕਿ ਉਨ੍ਹਾਂ ਨੇ ਖੁਲ੍ਹ ਕੇ ਮਮਦਾਨੀ ਦੇ ਵਿਰੋਧੀ ਐਂਡਰਿਊ ਕੁਓਮੋ ਦਾ ਸਮਰਥਨ ਕੀਤਾ ਸੀ।
ਟਰੰਪ ਨੇ ਦਿੱਤੀ ਸੀ ਚੇਤਾਵਨੀ
ਰਾਸ਼ਟਰਪਤੀ ਟਰੰਪ ਨੇ ਚੋਣ ਪ੍ਰਚਾਰ ਦੌਰਾਨ ਮਮਦਾਨੀ ਨੂੰ “ਪਾਗਲ ਕਮਿਊਨਿਸਟ” ਕਹਿੰਦੇ ਹੋਏ ਨਿਊਯਾਰਕ ਦੇ ਵੋਟਰਾਂ ਨੂੰ ਉਨ੍ਹਾਂ ਤੋਂ ਦੂਰ ਰਹਿਣ ਦੀ ਅਪੀਲ ਕੀਤੀ ਸੀ। ਉਨ੍ਹਾਂ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘Truth Social’ 'ਤੇ ਇੱਥੋਂ ਤਕ ਕਿਹਾ ਕਿ ਜੇ ਮਮਦਾਨੀ ਚੁਣੇ ਗਏ ਤਾਂ ਉਹ ਸ਼ਹਿਰ ਲਈ ਫੈਡਰਲ ਫੰਡ ਘਟਾ ਦੇਣਗੇ। ਪਰ ਨਿਊਯਾਰਕ ਦੇ ਵੋਟਰਾਂ ਨੇ ਉਨ੍ਹਾਂ ਦੀ ਗੱਲ ਨੂੰ ਨਜ਼ਰਅੰਦਾਜ਼ ਕਰਦਿਆਂ ਮਮਦਾਨੀ ਨੂੰ ਭਾਰੀ ਬਹੁਮਤ ਨਾਲ ਜਿੱਤਾਇਆ।
ਚੋਣ ਨਤੀਜੇ
ਤਿਕੋਣੀ ਮੁਕਾਬਲੇ ਵਿੱਚ ਮਮਦਾਨੀ ਨੇ ਇਹ ਜਿੱਤ ਹਾਸਲ ਕੀਤੀ:
ਜ਼ੋਹਰਾਨ ਮਮਦਾਨੀ (ਡੈਮੋਕ੍ਰੈਟ): 9,48,202 ਵੋਟਾਂ (ਲਗਭਗ 50.6%)
ਐਂਡਰਿਊ ਕੁਓਮੋ (ਆਜ਼ਾਦ ਉਮੀਦਵਾਰ): 7,76,547 ਵੋਟਾਂ (41.3%)
ਕਰਟਿਸ ਸਲਿਵਾ (ਰਿਪਬਲਿਕਨ): 1,37,030 ਵੋਟਾਂ
ਟਰੰਪ ਦੀ ਖੁੱਲ੍ਹੀ ਸਮਰਥਨਾ ਦੇ ਬਾਵਜੂਦ ਕੁਓਮੋ ਆਪਣੀ ਹਾਰ ਨਹੀਂ ਟਾਲ ਸਕੇ।
ਜਾਣੋ ਕੌਣ ਹਨ ਜ਼ੋਹਰਾਨ ਮਮਦਾਨੀ
ਜ਼ੋਹਰਾਨ ਮਮਦਾਨੀ ਦਾ ਜੀਵਨ ਸਫ਼ਰ ਬਹੁਤ ਵਿਲੱਖਣ ਹੈ।
ਉਨ੍ਹਾਂ ਦਾ ਜਨਮ ਯੂਗਾਂਡਾ ਦੀ ਰਾਜਧਾਨੀ ਕੰਪਾਲਾ ਵਿੱਚ ਹੋਇਆ ਸੀ ਅਤੇ ਸੱਤ ਸਾਲ ਦੀ ਉਮਰ ਵਿੱਚ ਉਹ ਪਰਿਵਾਰ ਸਮੇਤ ਨਿਊਯਾਰਕ ਆ ਗਏ।
ਮਮਦਾਨੀ ਦੀ ਮਾਂ ਪ੍ਰਸਿੱਧ ਭਾਰਤੀ ਫਿਲਮਕਾਰ ਮੀਰਾ ਨਾਇਰ ਹਨ, ਜਿਨ੍ਹਾਂ ਨੇ “Monsoon Wedding” ਅਤੇ “Salaam Bombay” ਵਰਗੀਆਂ ਫ਼ਿਲਮਾਂ ਬਣਾਈਆਂ। ਉਨ੍ਹਾਂ ਦੇ ਪਿਤਾ, ਮਹਿਮੂਦ ਮਮਦਾਨੀ, ਦਾ ਜਨਮ ਮੁੰਬਈ ਵਿੱਚ ਹੋਇਆ ਸੀ ਅਤੇ ਉਹ Columbia University ਵਿੱਚ ਪ੍ਰੋਫੈਸਰ ਹਨ।
ਰਾਜਨੀਤੀ ਵਿੱਚ ਆਉਣ ਤੋਂ ਪਹਿਲਾਂ ਜ਼ੋਹਰਾਨ ਨੇ “Mr. Cardamom” ਨਾਂ ਨਾਲ ਰੈਪਰ ਦੇ ਤੌਰ 'ਤੇ ਕੰਮ ਕੀਤਾ ਅਤੇ 2020 ਵਿਚ Queens ਦੇ ਐਸਟੋਰੀਆ ਖੇਤਰ ਤੋਂ ਨਿਊਯਾਰਕ ਸਟੇਟ ਐਸੈਂਬਲੀ ਲਈ ਚੁਣੇ ਗਏ।
ਜ਼ੋਹਰਾਨ ਮਮਦਾਨੀ ਦੀ ਇਹ ਜਿੱਤ ਸਿਰਫ਼ ਨਿਊਯਾਰਕ ਲਈ ਹੀ ਨਹੀਂ, ਸਗੋਂ ਦੁਨੀਆ ਭਰ ਵਿੱਚ ਭਾਰਤ ਮੂਲ ਦੇ ਲੋਕਾਂ ਲਈ ਮਾਣ ਦਾ ਪਲ ਬਣੀ ਹੈ।
Indian origin Zohran Mamdani Becomes The New Mayor Of New York A Big Blow To Donald Trump
