November 12, 2025
Washingtonਕੈਂਟ ਸਿਟੀ ਕੌਂਸਲ ਚੋਣ ’ਚ ਇਕ ਹੋਰ ਪੰਜਾਬਣ ਦੀ ਇਤਿਹਾਸਕ ਜਿੱਤ
ਕੈਂਟ,ਵਾਸ਼ਿੰਗਟਨ— (ਗੁਰਪ੍ਰੀਤ ਸਿੰਘ ਧੰਜੂ )ਕੈਂਟ ਸਿਟੀ ਕੌਂਸਲ ਦੀ ਚੋਣ ਵਿੱਚ ਇਕ ਹੋਰ ਪੰਜਾਬਣ ਉਮੀਦਵਾਰ ਸ਼ਰਨ ਸ਼ੋਕਰ ਨੇ ਇਤਿਹਾਸਕ ਜਿੱਤ ਦਰਜ ਕੀਤੀ ਹੈ। ਇਕ ਹਫ਼ਤੇ ਤੱਕ ਚੱਲੇ ਗਿਣਤੀ ਪ੍ਰਕਿਰਿਆ ਤੋਂ ਬਾਅਦ ਅੰਤਿਮ ਨਤੀਜਾ ਐਲਾਨਿਆ ਗਿਆ, ਜਿਸ ’ਚ ਸ਼ੋਕਰ ਨੇ ਆਪਣੇ ਮੁਕਾਬਲੇਬਾਜ਼ ਐਂਡੀ ਸੋਂਗ ਨੂੰ ਹਰਾ ਦਿੱਤਾ।
ਸ਼ੋਕਰ ਨੇ ਜਿੱਤ ਮੌਕੇ ਕਿਹਾ —
“ਇਹ ਸਿਰਫ਼ ਮੇਰੀ ਨਹੀਂ, ਸਾਡੇ ਪੂਰੇ ਕੈਂਟ ਦੀ ਜਿੱਤ ਹੈ। ਮੈਂ ਲੋਕਾਂ ਦੇ ਭਰੋਸੇ ਲਈ ਸਦਾ ਆਭਾਰੀ ਰਹਾਂਗੀ ਅਤੇ ਸਾਡੇ ਸ਼ਹਿਰ, ਗੁਆਂਢਾਂ ਤੇ ਭਵਿੱਖ ਲਈ ਪੂਰੀ ਤਨਦੇਹੀ ਨਾਲ ਮਿਹਨਤ ਕਰਾਂਗੀ।”
ਉਨ੍ਹਾਂ ਨੇ ਐਂਡੀ ਸੋਂਗ ਦੀ ਵੀ ਸਰਾਹਨਾ ਕੀਤੀ ਤੇ ਕਿਹਾ ਕਿ ਉਹ ਉਸ ਨਾਲ ਮਿਲ ਕੇ ਸ਼ਹਿਰ ਦੇ ਵਿਕਾਸ ਲਈ ਕੰਮ ਕਰਨਗੇ।
ਸ਼ੋਕਰ ਨੇ ਦੱਸਿਆ ਕਿ ਉਨ੍ਹਾਂ ਦੀ ਟੀਮ ਨੇ ਛੇ ਮਹੀਨੇ ਪਹਿਲਾਂ ਸਿਰਫ਼ ਜਜ਼ਬੇ ਅਤੇ ਮਿਹਨਤ ਨਾਲ ਮੁਹਿੰਮ ਸ਼ੁਰੂ ਕੀਤੀ ਸੀ। “ਸਾਡੇ ਕੋਲ ਨਾ ਕੋਈ ਰਾਜਨੀਤਿਕ ਸਬੰਧ ਸਨ, ਨਾ ਕੋਈ ਵੱਡਾ ਨਾਮ — ਸਿਰਫ਼ ਦਿਲ, ਮਿਹਨਤ ਅਤੇ ਲੋਕਾਂ ਲਈ ਖੜ੍ਹੇ ਹੋਣ ਦੀ ਆਸ ਸੀ,” ਉਨ੍ਹਾਂ ਨੇ ਕਿਹਾ।
ਉਨ੍ਹਾਂ ਨੇ ਆਪਣੇ ਪਰਿਵਾਰ, ਦੋਸਤਾਂ ਅਤੇ ਸੇਵਾਦਾਰਾਂ ਦਾ ਧੰਨਵਾਦ ਕੀਤਾ ਜਿਨ੍ਹਾਂ ਨੇ ਹਰ ਕਦਮ ’ਤੇ ਸਾਥ ਦਿੱਤਾ। “ਹਰ ਵੋਟ, ਹਰ ਦਰਵਾਜ਼ਾ, ਹਰ ਗੱਲਬਾਤ ਨੇ ਸਾਨੂੰ ਮਜ਼ਬੂਤ ਬਣਾਇਆ,” ਉਨ੍ਹਾਂ ਨੇ ਕਿਹਾ।
ਸ਼ੋਕਰ ਨੇ ਜੋੜਿਆ ਕਿ ਉਹ ਸਿਟੀ ਕੌਂਸਲ ’ਚ ਲੋਕਾਂ ਦੀਆਂ ਆਵਾਜ਼ਾਂ ਨੂੰ ਉੱਥੇ ਲਿਜਾਣ ਲਈ ਵਚਨਬੱਧ ਹਨ। “ਮੇਰੇ ਲਈ ਰਾਜਨੀਤੀ ਦਾ ਮਤਲਬ ਪਦ ਨਹੀਂ, ਲੋਕਾਂ ਦੀਆਂ ਜ਼ਿੰਦਗੀਆਂ ਵਿੱਚ ਸੁਧਾਰ ਲਿਆਉਣਾ ਹੈ,” ਉਨ੍ਹਾਂ ਨੇ ਕਿਹਾ।
ਇਸ ਜਿੱਤ ਨਾਲ ਸ਼ੋਕਰ ਨੇ ਨਾ ਸਿਰਫ਼ ਕੈਂਟ ਦੀ ਰਾਜਨੀਤੀ ਵਿੱਚ ਨਵਾਂ ਇਤਿਹਾਸ ਰਚਿਆ ਹੈ, ਬਲਕਿ ਸਿੱਖ ਅਤੇ ਦੱਖਣੀ ਏਸ਼ੀਆਈ ਕਮਿਊਨਿਟੀ ਲਈ ਵੀ ਮਾਣ ਦਾ ਮੌਕਾ ਪੈਦਾ ਕੀਤਾ ਹੈ। “ਧੰਨਵਾਦ ਕੈਂਟ — ਇਹ ਜਿੱਤ ਸਾਡੀ ਸਭ ਦੀ ਹੈ!”
Another Punjabi Woman s Historic Victory In Kent City Council Elections
