Saudi Arabia Accident : ਉਮਰਾਹ ਤੋਂ ਵਾਪਸ ਆ ਰਹੇ ਭਾਰਤੀਆਂ ਨਾਲ ਦਰਦਨਾਕ ਹਾਦਸਾ, 42 ਮੌ*ਤਾਂ

ਨਵੀਂ ਦਿੱਲੀ/ਰਿਆਦ, 17 ਨਵੰਬਰ, 2025 : ਸਾਊਦੀ ਅਰਬ 'ਚ ਸੋਮਵਾਰ ਤੜਕੇ ਇੱਕ ਖ਼ੌਫ਼ਨਾਕ ਸੜਕ ਹਾਦਸਾ ਵਾਪਰਿਆ, ਜਿੱਥੇ ਉਮਰਾਹ ਦੀ ਯਾਤਰਾ ਪੂਰੀ ਕਰਕੇ ਵਾਪਸੀ ਕਰ ਰਹੇ ਭਾਰਤੀ ਤੀਰਥ ਯਾਤਰੀਆਂ ਦੀ ਬੱਸ ਇੱਕ ਡੀਜ਼ਲ ਟੈਂਕਰ ਨਾਲ ਭਿੱਡ ਗਈ। ਹਾਦਸਾ ਭਾਰਤੀ ਸਮੇਂ ਮੁਤਾਬਕ ਕਰੀਬ ਰਾਤ 1:30 ਵਜੇ ਮੁਫ਼ਰੀਹਾਟ ਖੇਤਰ ਵਿੱਚ ਵਾਪਰਿਆ। ਪ੍ਰਾਰੰਭਿਕ ਜਾਣਕਾਰੀ ਅਨੁਸਾਰ, ਇਸ ਘਟਨਾ ਵਿੱਚ 42 ਭਾਰਤੀ ਨਾਗਰਿਕਾਂ ਦੇ ਮਾਰੇ ਜਾਣ ਦੀ ਸ਼ੰਕਾ ਹੈ।

ਬੱਸ 'ਚ 43 ਯਾਤਰੀ—ਸਿਰਫ਼ ਇੱਕ ਜਿੰਦਾ ਬਚਿਆ

MediaOne ਦੀ ਰਿਪੋਰਟ ਮੁਤਾਬਕ, ਬੱਸ 'ਚ ਸਵਾਰ ਕੁੱਲ 43 ਯਾਤਰੀਆਂ 'ਚੋਂ ਕੇਵਲ ਇੱਕ ਹੀ ਵਿਅਕਤੀ ਜ਼ਿੰਦਾ ਬਚਿਆ ਹੈ, ਜਿਸਨੂੰ ਗੰਭੀਰ ਹਾਲਤ 'ਚ ਹਸਪਤਾਲ 'ਚ ਦਾਖਲ ਕਰਵਾਇਆ ਗਿਆ ਹੈ। ਬਾਕੀ ਸਾਰੇ ਯਾਤਰੀ ਭਾਰਤ ਦੇ ਹੈਦਰਾਬਾਦ ਸ਼ਹਿਰ ਦੇ ਰਹਿਣ ਵਾਲੇ ਸਨ। ਮਰਨ ਵਾਲਿਆਂ ਵਿੱਚ 20 ਔਰਤਾਂ ਅਤੇ 11 ਬੱਚੇ ਵੀ ਸ਼ਾਮਲ ਹਨ। ਟੱਕਰ ਤੋਂ ਬਾਅਦ ਬੱਸ ਦੇ ਹਿੱਸੇ ਵਿਖਰ ਗਏ ਅਤੇ ਅੱਗ ਲੱਗ ਗਈ, ਜਿਸ ਨਾਲ ਰਾਹਤ ਕੰਮ ਹੋਰ ਮੁਸ਼ਕਲ ਹੋ ਗਿਆ।

ਉਮਰਾਹ ਤੋਂ ਬਾਅਦ ਮਦੀਨਾ ਵੱਲ ਜਾ ਰਹੇ ਸਨ ਯਾਤਰੀ

ਸੂਤਰਾਂ ਨੇ ਦੱਸਿਆ ਹੈ ਕਿ ਤੀਰਥ ਯਾਤਰੀ ਮੱਕਾ 'ਚ ਉਮਰਾਹ ਦੇ ਕਿਰਿਆ-ਕਰਮ ਪੂਰੇ ਕਰ ਚੁੱਕੇ ਸਨ ਅਤੇ ਮਦੀਨਾ ਵਿੱਚ ਜ਼ਿਆਰਤ ਕਰਨ ਜਾ ਰਹੇ ਸਨ। ਰਾਤ ਦੇ ਸਮੇਂ ਯਾਤਰਾ ਦੌਰਾਨ ਜ਼ਿਆਦਾਤਰ ਯਾਤਰੀ ਸੌਂ ਰਹੇ ਸਨ, ਜਿਸ ਕਰਕੇ ਉਹ ਹਾਦਸੇ ਨੂੰ ਸਮਝ ਵੀ ਨਾ ਸਕੇ।

ਭਾਰਤੀ ਦੂਤਾਵਾਸ ਵੱਲੋਂ ਜਾਰੀ ਹੋਇਆ ਹੈਲਪਲਾਈਨ ਨੰਬਰ

ਇਸ ਦਰਦਨਾਕ ਘਟਨਾ ਤੋਂ ਬਾਅਦ ਭਾਰਤੀ ਕੌਂਸਲੇਟ ਨੇ ਤੁਰੰਤ ਮਦਦ ਲਈ ਇੱਕ ਹੈਲਪਲਾਈਨ ਨੰਬਰ ਜਾਰੀ ਕੀਤਾ ਹੈ:
Toll Free: 8002440003
ਦੂਤਾਵਾਸ ਨੇ ਕਿਹਾ ਹੈ ਕਿ 24x7 ਕੰਟਰੋਲ ਰੂਮ ਬਣਾਇਆ ਗਿਆ ਹੈ ਅਤੇ ਸਾਰੇ ਸਥਾਨਕ ਅਧਿਕਾਰੀਆਂ ਨਾਲ ਲਗਾਤਾਰ ਸੰਪਰਕ ਕੀਤਾ ਜਾ ਰਿਹਾ ਹੈ।

ਹਾਦਸੇ ਦੀ ਜਾਂਚ ਜਾਰੀ

ਸਾਊਦੀ ਪ੍ਰਸ਼ਾਸਨ ਵਲੋਂ ਹਾਲੇ ਅਧਿਕਾਰਤ ਤੌਰ 'ਤੇ ਮੌਤਾਂ ਦੀ ਪੁਸ਼ਟੀ ਨਹੀਂ ਹੋਈ, ਪਰ Haj & Umrah Ministry ਅਤੇ ਸੰਬੰਧਤ travel agency ਨੇ ਦੁਰਘਟਨਾ ਦੀ ਤਸਦੀਕ ਕਰ ਦਿੱਤੀ ਹੈ। ਰਾਹਤ ਟੀਮਾਂ ਮਲਬੇ 'ਚੋਂ ਮ੍ਰਿਤਕਾਂ ਅਤੇ ਜ਼ਖ਼ਮੀਆਂ ਨੂੰ ਬਾਹਰ ਕੱਢਣ ਲਈ ਲੱਗੀਆਂ ਹੋਈਆਂ ਹਨ। ਹਾਦਸੇ ਦੇ ਅਸਲ ਕਾਰਣਾਂ ਦੀ ਗਹਿਰਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।