Donald Trump–Zohran Mamdani ਦੀ ਇਤਿਹਾਸਕ ਮੁਲਾਕਾਤ, ਜਾਣੋ ਕੀ ਹੋਈ ਗੱਲਬਾਤ

ਵਾਸ਼ਿੰਗਟਨ/ਨਿਊਯਾਰਕ, 22 ਨਵੰਬਰ 2025 : ਅਮਰੀਕੀ ਰਾਜਨੀਤੀ ਵਿੱਚ ਸ਼ੁੱਕਰਵਾਰ ਨੂੰ ਇੱਕ ਅਨੋਖਾ ਦ੍ਰਿਸ਼ ਸਾਮ੍ਹਣੇ ਆਇਆ, ਜਦੋਂ ਵ੍ਹਾਈਟ ਹਾਊਸ ਦੇ ਓਵਲ ਆਫਿਸ ਵਿੱਚ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਨਿਊਯਾਰਕ ਸਿਟੀ ਦੇ ਨਵੇਂ ਮੇਅਰ ਜ਼ੋਹਰਾਨ ਮਮਦਾਨੀ ਦੀ ਪਹਿਲੀ ਅਧਿਕਾਰਤ ਮੁਲਾਕਾਤ ਹੋਈ। ਚੋਣ ਦੌਰਾਨ ਇੱਕ–ਦੂਜੇ ‘ਤੇ ਤਿੱਖੀ ਤਨਕ਼ੀਦ ਕਰਨ ਵਾਲੇ ਦੋਵੇਂ ਆਗੂ ਇਸ ਮੀਟਿੰਗ ਵਿੱਚ ਕਾਫ਼ੀ ਸੰਤੁਲਿਤ ਤੇ ਸ਼ਾਂਤ ਨਜ਼ਰ ਆਏ।

ਪੁਰਾਣੀ ਖਟਾਸ ਤੋਂ ਬਾਹਰ ਆਕੇ ਮੁੱਦਿਆਂ ‘ਤੇ ਗੱਲਬਾਤ

ਮੀਟਿੰਗ ਦੌਰਾਨ ਟਰੰਪ ਅਤੇ ਮਮਦਾਨੀ ਨੇ ਮਹਿੰਗਾਈ, ਘਰਾਂ ਦੀ ਵਧਦੀ ਕਮੀ ਅਤੇ ਹਾਊਸਿੰਗ ਨੀਤੀ ਵਰਗੇ ਅਹਿਮ ਮਸਲਿਆਂ ‘ਤੇ ਮਿਲ ਕੇ ਕੰਮ ਕਰਨ ਦੀ ਇੱਛਾ ਜਤਾਈ। ਟਰੰਪ ਨੇ ਕਿਹਾ ਕਿ ਉਹ ਨਿਊਯਾਰਕ ਨੂੰ ਹੋਰ ਸੁਰੱਖਿਅਤ ਅਤੇ ਮਜ਼ਬੂਤ ਬਣਾਉਣ ਲਈ ਮੇਅਰ ਦੇ ਨਾਲ ਮਿਲ ਕੇ ਕਦਮ ਚੁੱਕਣਗੇ, ਜਦਕਿ ਮਮਦਾਨੀ ਨੇ ਵੀ ਇਸ ਗੱਲ ‘ਤੇ ਰਾਹਤ ਜਤਾਈ ਕਿ ਬੈਠਕ ਸਿਆਸੀ ਟਕਰਾਅ ਦੀ ਬਜਾਏ ਲੋਕਾਂ ਦੀਆਂ ਲੋੜਾਂ ‘ਤੇ ਕੇਂਦਰਿਤ ਰਹੀ। ਟਰੰਪ ਨੇ ਮਮਦਾਨੀ ਬਾਰੇ ਇਹ ਟਿੱਪਣੀ ਵੀ ਕੀਤੀ—“ਇਹ ਕਈ ਕੰਜ਼ਰਵੇਟਿਵ ਲੋਕਾਂ ਲਈ ਚੌਂਕਾਉਣ ਵਾਲੀ ਗੱਲ ਹੋ ਸਕਦੀ ਹੈ।”

ਚੋਣਾਂ ਵਿੱਚ ਤਿੱਖੇ ਹਮਲੇ—ਹੁਣ ਸਾਂਝੇ ਹੱਲ ਲੱਭਣ ਦੀ ਕੋਸ਼ਿਸ਼

ਇਹ ਮੁਲਾਕਾਤ ਇਸ ਲਈ ਵੀ ਖ਼ਾਸ ਰਹੀ ਕਿਉਂਕਿ ਚੋਣੀ ਦੌਰ ਵਿੱਚ ਟਰੰਪ ਨੇ ਮਮਦਾਨੀ ਨੂੰ “ਕਮਿਊਨਿਸਟ” ਕਿਹਾ ਸੀ ਅਤੇ ਫੈਡਰਲ ਫੰਡਿੰਗ ਤੱਕ ਰੋਕਣ ਦੀ ਚੇਤਾਵਨੀ ਦਿੱਤੀ ਸੀ। ਦੂਜੇ ਪਾਸੇ, ਮਮਦਾਨੀ ਨੇ ਟਰੰਪ ਸਰਕਾਰ ਨੂੰ “ਸੱਤਾਵਾਦੀ” ਕਹਿ ਕੇ ਤਿੱਖੇ ਹਮਲੇ ਕੀਤੇ ਸਨ।

ਪਰ ਇਸ ਮੀਟਿੰਗ ਵਿੱਚ ਦੋਵੇਂ ਨੇ ਇਹ ਮਨਿਆ ਕਿ ਘਰਾਂ ਦੀ ਨਿਰਮਾਣ ਪਾਲਸੀ ਅਤੇ ਕਿਰਾਇਆ ਕੰਟਰੋਲ ਵਰਗੇ ਕਈ ਮੁੱਦਿਆਂ ‘ਤੇ ਉਨ੍ਹਾਂ ਦੀ ਸੋਚ ਮਿਲਦੀ ਹੈ।

ਮਹਿੰਗਾਈ—ਦੋਵਾਂ ਆਗੂਆਂ ਲਈ ਸਭ ਤੋਂ ਵੱਡਾ ਚੈਲੇਂਜ

ਟਰੰਪ ਅਤੇ ਮਮਦਾਨੀ ਦੋਵੇਂ ਨੇ ਆਪਣੀ–ਆਪਣੀ ਚੋਣ ਪ੍ਰਚਾਰ ਵਿੱਚ ਮਹਿੰਗਾਈ ਨੂੰ ਮੁੱਖ ਮੁੱਦਾ ਬਣਾਇਆ ਸੀ। ਟਰੰਪ ਨੂੰ ਰਾਸ਼ਟਰੀ ਪੱਧਰ ‘ਤੇ ਕੀਮਤਾਂ ਨੂੰ ਕਾਬੂ ਕਰਨਾ ਹੈ, ਜਦਕਿ ਮਮਦਾਨੀ ‘ਤੇ ਨਿਊਯਾਰਕ ਵਿੱਚ ਰਿਹਾਇਸ਼ ਸਸਤੀ ਬਣਾਉਣ ਦਾ ਦਬਾਅ ਹੈ।

ਮਮਦਾਨੀ ਨੇ ਦੱਸਿਆ ਕਿ ਇਹ ਮੀਟਿੰਗ ਇਸ ਲਈ ਮੰਗੀ ਗਈ ਸੀ ਤਾਂ ਜੋ ਸ਼ਹਿਰ ਨੂੰ ਆਮ ਲੋਕਾਂ ਲਈ ਰਹਿਣ–ਯੋਗ ਬਣਾਉਣ ਲਈ ਕੁਝ ਸਾਂਝੇ ਕਦਮ ਲੱਭੇ ਜਾ ਸਕਣ।

ਮੀਟਿੰਗ ਨੇ ਇਹ ਸੰਕੇਤ ਦਿੱਤਾ ਹੈ ਕਿ ਭਾਵੇਂ ਬਿਆਨਾਂ ਦੀ ਕਸ਼ਮਕਸ਼ ਕਾਫ਼ੀ ਰਹੀ ਹੋਵੇ, ਪਰ ਹੁਣ ਦੋਵੇਂ ਅਗਾਮੀ ਚੁਣੌਤੀਆਂ ਨੂੰ ਇਕੱਠੇ ਹੱਲ ਕਰਨ ਵੱਲ ਅੱਗੇ ਵਧ ਸਕਦੇ ਹਨ।