December 17, 2025
Seattleਸਿਆਟਲ ਦੇ ਭਾਰਤੀ ਰੈਸਟੋਰੈਂਟ ਵਿੱਚ ਖਾਣੇ ਦੀ ਸੁਰੱਖਿਆ ਉਲੰਘਣਾਂ ਦੀ ਜਾਂਚ, ਬਿਮਾਰੀ ਫੈਲਣ ਤੋਂ ਬਾਅਦ ਕਾਰਵਾਈ ਸ਼ੁਰੂ
Live Punjabi TV Bureau
ਸਿਆਟਲ ਵਾਸ਼ਿੰਗਟਨ (ਨਿਊਜ਼ ਡੈਸਕ ) 17 December 2025 : ਸਿਆਟਲ ਵਿੱਚ ਸਥਿਤ ਭਾਰਤੀ ਰੈਸਟੋਰੈਂਟ ਕਨੀਸ਼ਕਾ ਕਿਊਜ਼ੀਨ ਆਫ਼ ਇੰਡੀਆ ਤੋਂ ਥੈਂਕਸਗਿਵਿੰਗ ਮੌਕੇ ਤਿਆਰ ਕੀਤੇ ਗਏ ਭੋਜਨ ਨਾਲ ਜੁੜੀ ਪੇਟ ਦੀ ਬਿਮਾਰੀ ਦੇ ਮਾਮਲੇ ਸਾਹਮਣੇ ਆਏ ਹਨ। ਇਸ ਬਿਮਾਰੀ ਨਾਲ ਹੁਣ ਤੱਕ 35 ਲੋਕ ਪ੍ਰਭਾਵਿਤ ਹੋ ਚੁੱਕੇ ਹਨ, ਜਿਸ ਤੋਂ ਬਾਅਦ ਪਬਲਿਕ ਹੈਲਥ ਅਧਿਕਾਰੀਆਂ ਵੱਲੋਂ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।
ਅਧਿਕਾਰੀਆਂ ਮੁਤਾਬਕ ਇਹ ਬਿਮਾਰੀਆਂ 28 ਅਤੇ 29 ਨਵੰਬਰ 2025 ਦੇ ਦਰਮਿਆਨ ਸ਼ੁਰੂ ਹੋਈਆਂ। ਇਹ ਸਾਰੇ ਮਾਮਲੇ ਰੈਸਟੋਰੈਂਟ ਵੱਲੋਂ ਤਿਆਰ ਕੀਤੇ ਗਏ “ਫਿਊਜ਼ਨ ਥੈਂਕਸਗਿਵਿੰਗ ਫੀਸਟ” ਨਾਲ ਸੰਬੰਧਿਤ ਹਨ, ਜੋ ਗਾਹਕਾਂ ਲਈ ਪਿਕਅੱਪ ਜਾਂ ਡਿਲਿਵਰੀ ਲਈ ਬਣਾਇਆ ਗਿਆ ਸੀ। ਹਾਲਾਂਕਿ ਹਜੇ ਤੱਕ ਕਿਸੇ ਇੱਕ ਖ਼ਾਸ ਖਾਣੇ ਜਾਂ ਪੇਅ ਨੂੰ ਬਿਮਾਰੀ ਦਾ ਕਾਰਨ ਨਹੀਂ ਮੰਨਿਆ ਗਿਆ, ਪਰ ਲੱਛਣ ਉਹੀ ਹਨ ਜੋ ਅਕਸਰ ਬੈਕਟੀਰੀਆਲ ਟਾਕਸਿਨ ਨਾਲ ਪੈਦਾ ਹੋਣ ਵਾਲੀ ਬਿਮਾਰੀ ਵਿੱਚ ਵੇਖੇ ਜਾਂਦੇ ਹਨ। ਇਹ ਟਾਕਸਿਨ ਆਮ ਤੌਰ ’ਤੇ ਖਾਣਾ ਲੰਮੇ ਸਮੇਂ ਤੱਕ ਕਮਰੇ ਦੇ ਤਾਪਮਾਨ ’ਤੇ ਰਹਿਣ ਕਾਰਨ ਬਣ ਜਾਂਦੇ ਹਨ।
ਪਬਲਿਕ ਹੈਲਥ ਅਧਿਕਾਰੀਆਂ ਨੇ ਹੁਣ ਤੱਕ 16 ਪ੍ਰਭਾਵਿਤ ਵਿਅਕਤੀਆਂ ਨਾਲ ਇੰਟਰਵਿਊ ਕਰਕੇ ਉਨ੍ਹਾਂ ਦੇ ਲੱਛਣਾਂ ਅਤੇ ਖਾਧੇ ਗਏ ਭੋਜਨ ਬਾਰੇ ਜਾਣਕਾਰੀ ਇਕੱਠੀ ਕੀਤੀ ਹੈ। ਰਿਪੋਰਟ ਕੀਤੇ ਲੱਛਣਾਂ ਵਿੱਚ ਦਸਤ, ਪੇਟ ਦਰਦ, ਮਤਲੀ, ਉਲਟੀ, ਥਕਾਵਟ, ਸਿਰ ਦਰਦ ਅਤੇ ਸਰੀਰ ਦਰਦ ਸ਼ਾਮਲ ਹਨ। ਰਾਹਤ ਦੀ ਗੱਲ ਇਹ ਹੈ ਕਿ ਕਿਸੇ ਵੀ ਮਰੀਜ਼ ਨੂੰ ਹਸਪਤਾਲ ਵਿੱਚ ਦਾਖ਼ਲ ਨਹੀਂ ਕਰਵਾਉਣਾ ਪਿਆ ਅਤੇ ਨਾ ਹੀ ਕਿਸੇ ਮੌਤ ਦੀ ਪੁਸ਼ਟੀ ਹੋਈ ਹੈ। ਇਸ ਤੋਂ ਇਲਾਵਾ, ਰੈਸਟੋਰੈਂਟ ਦੇ ਕਿਸੇ ਵੀ ਕਰਮਚਾਰੀ ਵਿੱਚ ਬਿਮਾਰੀ ਦੇ ਲੱਛਣ ਨਹੀਂ ਪਾਏ ਗਏ।
2 ਦਸੰਬਰ ਨੂੰ ਕੀਤੀ ਗਈ ਜਾਂਚ ਦੌਰਾਨ ਕਨੀਸ਼ਕਾ ਕਿਊਜ਼ੀਨ ਆਫ਼ ਇੰਡੀਆ ਵਿੱਚ ਖਾਣੇ ਦੀ ਸੁਰੱਖਿਆ ਨਾਲ ਸੰਬੰਧਿਤ ਕਈ ਉਲੰਘਣਾਂ ਸਾਹਮਣੇ ਆਈਆਂ। ਇਨ੍ਹਾਂ ਵਿੱਚ ਵੱਡੀ ਮਾਤਰਾ ਵਿੱਚ ਭੋਜਨ ਤਿਆਰ ਕਰਨ ਲਈ ਲੋੜੀਂਦਾ ਢੁੱਕਵਾਂ ਸਾਜ਼ੋ-ਸਮਾਨ ਅਤੇ ਥਾਂ ਦੀ ਘਾਟ, ਖਾਣੇ ਨੂੰ ਠੰਢਾ ਕਰਨ ਦੇ ਗਲਤ ਤਰੀਕੇ, ਅਤੇ ਖਾਣੇ ਨੂੰ ਸੁਰੱਖਿਅਤ ਤਾਪਮਾਨ ’ਤੇ ਨਾ ਰੱਖਣਾ ਸ਼ਾਮਲ ਹੈ।
ਪਬਲਿਕ ਹੈਲਥ ਅਧਿਕਾਰੀਆਂ ਵੱਲੋਂ ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਲੋਕਾਂ ਨੂੰ ਖਾਣੇ ਦੀ ਸੁਰੱਖਿਆ ਪ੍ਰਤੀ ਸਾਵਧਾਨ ਰਹਿਣ ਦੀ ਅਪੀਲ ਕੀਤੀ ਗਈ ਹੈ।
Seattle Indian Restaurant Under Investigation For Food Safety Violations Action Taken After Illness Outbreak
