November 4, 2025
Britianਹਿੰਦੂਜਾ ਗਰੁੱਪ ਦੇ ਚੇਅਰਮੈਨ ਗੋਪੀਚੰਦ ਹਿੰਦੂਜਾ ਦਾ ਲੰਡਨ ਵਿੱਚ ਦਿਹਾਂਤ, 85 ਸਾਲ ਦੀ ਉਮਰ 'ਚ ਬਿਜ਼ਨਸ ਦੁਨੀਆ 'ਚ ਛਾਇਆ ਸੋਗ
ਨਵੀਂ ਦਿੱਲੀ/ਲੰਡਨ, 5 ਨਵੰਬਰ 2025 :ਦੁਨੀਆ ਭਰ ਦੇ ਕਾਰੋਬਾਰੀ ਜਗਤ ਲਈ ਅੱਜ ਇੱਕ ਵੱਡੀ ਖ਼ਬਰ ਆਈ ਹੈ। ਹਿੰਦੂਜਾ ਗਰੁੱਪ ਦੇ ਚੇਅਰਮੈਨ ਅਤੇ ਪ੍ਰਸਿੱਧ ਉਦਯੋਗਪਤੀ ਗੋਪੀਚੰਦ ਪਰਮਾਨੰਦ ਹਿੰਦੂਜਾ ਦਾ ਲੰਡਨ ਦੇ ਇੱਕ ਹਸਪਤਾਲ 'ਚ ਅੱਜ ਸਵੇਰੇ ਦਿਹਾਂਤ ਹੋ ਗਿਆ। ਉਹ 85 ਸਾਲ ਦੇ ਸਨ ਅਤੇ ਕਾਫ਼ੀ ਸਮੇਂ ਤੋਂ ਬਿਮਾਰ ਚੱਲ ਰਹੇ ਸਨ।
ਗੋਪੀਚੰਦ ਹਿੰਦੂਜਾ, ਜਿਨ੍ਹਾਂ ਨੂੰ ਉਦਯੋਗ ਜਗਤ ਵਿੱਚ ‘ਜੀਪੀ ਹਿੰਦੂਜਾ’ ਦੇ ਨਾਂ ਨਾਲ ਜਾਣਿਆ ਜਾਂਦਾ ਸੀ, ਹਿੰਦੂਜਾ ਪਰਿਵਾਰ ਦੇ ਚਾਰ ਭਰਾਵਾਂ ਵਿੱਚੋਂ ਦੂਜੇ ਸਨ। ਮਈ 2023 ਵਿੱਚ ਵੱਡੇ ਭਰਾ ਸ੍ਰੀਚੰਦ ਹਿੰਦੂਜਾ ਦੇ ਦਿਹਾਂਤ ਤੋਂ ਬਾਅਦ ਉਨ੍ਹਾਂ ਨੇ ਗਰੁੱਪ ਦੀ ਬਾਗਡੋਰ ਆਪਣੇ ਹੱਥਾਂ ਵਿੱਚ ਲਈ ਸੀ। ਉਨ੍ਹਾਂ ਦੇ ਪਰਿਵਾਰ ਵਿੱਚ ਪਤਨੀ ਸੁਨੀਤਾ ਹਿੰਦੂਜਾ, ਦੋ ਪੁੱਤਰ ਸੰਜੇ ਤੇ ਧੀਰਜ ਅਤੇ ਇੱਕ ਧੀ ਰੀਟਾ ਸ਼ਾਮਲ ਹਨ।
ਬ੍ਰਿਟੇਨ ਦੇ ਸਭ ਤੋਂ ਅਮੀਰ ਉਦਯੋਗਪਤੀਆਂ ਵਿੱਚ ਸ਼ੁਮਾਰ
ਗੋਪੀਚੰਦ ਹਿੰਦੂਜਾ ਬ੍ਰਿਟੇਨ ਦੇ ਸਭ ਤੋਂ ਧਨਾਢ੍ਯ ਵਿਅਕਤੀਆਂ ਵਿੱਚ ਗਿਣੇ ਜਾਂਦੇ ਸਨ।
ਸਨਡੇ ਟਾਈਮਜ਼ ਰਿਚ ਲਿਸਟ (Sunday Times Rich List) 2025 ਅਨੁਸਾਰ, ਹਿੰਦੂਜਾ ਪਰਿਵਾਰ ਨੂੰ ਸਭ ਤੋਂ ਅਮੀਰ ਪਰਿਵਾਰ ਦਾ ਦਰਜਾ ਪ੍ਰਾਪਤ ਸੀ।
ਉਸ ਸੂਚੀ ਮੁਤਾਬਕ, ਉਨ੍ਹਾਂ ਦੀ ਨਿੱਜੀ ਅਤੇ ਪਰਿਵਾਰਕ ਦੌਲਤ ਦਾ ਅੰਦਾਜ਼ਾ ਲਗਭਗ 37 ਬਿਲੀਅਨ ਪਾਊਂਡ (ਤਕਰੀਬਨ 33,68,000 ਕਰੋੜ ਰੁਪਏ) ਲਗਾਇਆ ਗਿਆ ਸੀ।
ਪਰਿਵਾਰਕ ਕਾਰੋਬਾਰ ਤੋਂ ਗਲੋਬਲ ਸਾਮਰਾਜ ਤੱਕ ਦਾ ਸਫਰ
ਮੁੰਬਈ ਦੇ ਜੈ ਹਿੰਦ ਕਾਲਜ ਤੋਂ ਗ੍ਰੈਜੂਏਸ਼ਨ ਪਾਸ ਕਰਨ ਤੋਂ ਬਾਅਦ, ਗੋਪੀਚੰਦ ਹਿੰਦੂਜਾ ਨੇ 1959 ਵਿੱਚ ਹਿੰਦੂਜਾ ਪਰਿਵਾਰਕ ਕਾਰੋਬਾਰ ਨੂੰ ਜੁਆਇਨ ਕੀਤਾ। ਉਨ੍ਹਾਂ ਦੀ ਦੂਰਦਰਸ਼ੀ ਸੋਚ ਅਤੇ ਪ੍ਰਬੰਧਕੀ ਕੁਸ਼ਲਤਾ ਨਾਲ ਹਿੰਦੂਜਾ ਗਰੁੱਪ ਨੇ ਟ੍ਰਾਂਸਪੋਰਟ ਤੇ ਵਪਾਰ ਦੀ ਸੀਮਾ ਤੋਂ ਅੱਗੇ ਵਧਦਿਆਂ ਬੈਂਕਿੰਗ, ਊਰਜਾ, ਆਟੋਮੋਬਾਈਲ, ਮੀਡੀਆ ਅਤੇ ਇਨਫਰਾਸਟ੍ਰਕਚਰ ਦੇ ਖੇਤਰਾਂ ਵਿੱਚ ਗਲੋਬਲ ਪੱਧਰ 'ਤੇ ਆਪਣੀ ਪਛਾਣ ਬਣਾਈ।
ਉਨ੍ਹਾਂ ਦੀ ਮੌਤ ਨਾਲ ਸਿਰਫ਼ ਹਿੰਦੂਜਾ ਪਰਿਵਾਰ ਹੀ ਨਹੀਂ, ਬਲਕਿ ਪੂਰਾ ਭਾਰਤੀ ਤੇ ਅੰਤਰਰਾਸ਼ਟਰੀ ਵਪਾਰ ਜਗਤ ਇੱਕ ਦੂਰਦਰਸ਼ੀ ਉਦਯੋਗਪਤੀ ਨੂੰ ਖੋ ਬੈਠਾ ਹੈ।
Hinduja Group Chairman Gopichand Hinduja Passes Away In London At The Age Of 85 Mourning In The Business World
