December 13, 2025
New Delhiਡਾਕੀਆ ਬਣਨਗੇ Mutual Fund Distributors! MOU 'ਤੇ ਹੋਇਆ ਸਾਈਨ
Live Punjabi TV Bureau
ਨਵੀਂ ਦਿੱਲੀ, 13 ਦਸੰਬਰ 2025 : ਦੇਸ਼ ਵਿੱਚ ਵਿੱਤੀ ਸੇਵਾਵਾਂ ਨੂੰ ਹਰ ਵਰਗ ਤੱਕ ਪਹੁੰਚਾਉਣ ਲਈ ਸਰਕਾਰ ਵੱਲੋਂ ਇੱਕ ਨਵਾਂ ਅਤੇ ਅਹਿਮ ਕਦਮ ਚੁੱਕਿਆ ਗਿਆ ਹੈ। ਸੰਚਾਰ ਮੰਤਰਾਲੇ ਅਤੇ ਬੰਬੇ ਸਟਾਕ ਐਕਸਚੇਂਜ (BSE) ਵਿਚਾਲੇ ਨਵੀਂ ਦਿੱਲੀ ਵਿੱਚ ਇੱਕ ਸਮਝੌਤਾ ਪੱਤਰ (MoU) ‘ਤੇ ਦਸਤਖ਼ਤ ਹੋਏ ਹਨ, ਜਿਸ ਦੇ ਤਹਿਤ ਹੁਣ ਇੰਡੀਆ ਪੋਸਟ ਦੇ ਕਰਮਚਾਰੀਆਂ ਨੂੰ ਮਿਉਚੁਅਲ ਫੰਡ ਸੇਵਾਵਾਂ ਨਾਲ ਜੋੜਿਆ ਜਾਵੇਗਾ।
ਇਸ ਸਮਝੌਤੇ ਅਨੁਸਾਰ ਡਾਕ ਵਿਭਾਗ ਦੇ ਚੁਣੇ ਹੋਏ ਕਰਮਚਾਰੀਆਂ ਨੂੰ ਖਾਸ ਟ੍ਰੇਨਿੰਗ ਦਿੱਤੀ ਜਾਵੇਗੀ, ਤਾਂ ਜੋ ਉਹ ਮਿਉਚੁਅਲ ਫੰਡ ਡਿਸਟ੍ਰੀਬਿਊਟਰ ਵਜੋਂ ਕੰਮ ਕਰ ਸਕਣ। ਇਸ ਨਾਲ ਲੋਕਾਂ ਨੂੰ ਆਪਣੇ ਹੀ ਇਲਾਕੇ ਵਿੱਚ ਨਿਵੇਸ਼ ਸੰਬੰਧੀ ਜਾਣਕਾਰੀ ਅਤੇ ਸਹਾਇਤਾ ਮਿਲ ਸਕੇਗੀ।
ਪੇਂਡੂ ਅਤੇ ਦੂਰ-ਦੁਰਾਡੇ ਖੇਤਰਾਂ ਤੱਕ ਪਹੁੰਚ ਦਾ ਟੀਚਾ
ਸੰਚਾਰ ਮੰਤਰਾਲੇ ਨੇ ਇਸ ਪਹਿਲ ਨੂੰ ਵਿੱਤੀ ਸਮਾਵੇਸ਼ ਵਧਾਉਣ ਵੱਲ ਇੱਕ ਵੱਡੀ ਕਦਮਕੜੀ ਦੱਸਿਆ ਹੈ। ਯੋਜਨਾ ਦਾ ਮੁੱਖ ਮਕਸਦ ਇੰਡੀਆ ਪੋਸਟ ਦੇ ਵਿਸ਼ਾਲ ਨੈੱਟਵਰਕ ਦੀ ਵਰਤੋਂ ਕਰਕੇ ਪੇਂਡੂ, ਅਰਧ-ਸ਼ਹਿਰੀ ਅਤੇ ਦੂਰ-ਦੁਰਾਡੇ ਇਲਾਕਿਆਂ ਵਿੱਚ ਨਿਵੇਸ਼ ਸੇਵਾਵਾਂ ਪਹੁੰਚਾਉਣਾ ਹੈ, ਜਿੱਥੇ ਬੈਂਕਿੰਗ ਅਤੇ ਵਿੱਤੀ ਸੰਸਥਾਵਾਂ ਦੀ ਮੌਜੂਦਗੀ ਘੱਟ ਹੈ।
ਹੁਣ ਡਾਕ ਕਰਮਚਾਰੀ ਸਿਰਫ਼ ਚਿੱਠੀਆਂ ਅਤੇ ਪਾਰਸਲ ਨਹੀਂ, ਸਗੋਂ ਲੋਕਾਂ ਨੂੰ ਮਿਉਚੁਅਲ ਫੰਡ ਨਾਲ ਜੁੜੀਆਂ ਲੈਣ-ਦੇਣ ਸੇਵਾਵਾਂ ਅਤੇ ਨਿਵੇਸ਼ ਦੇ ਵਿਕਲਪਾਂ ਬਾਰੇ ਵੀ ਮਾਰਗਦਰਸ਼ਨ ਦੇ ਸਕਣਗੇ।
ਨਿਵੇਸ਼ ਦੇ ਮੌਕੇ ਆਮ ਲੋਕਾਂ ਲਈ ਹੋਣਗੇ ਆਸਾਨ
ਮੰਤਰਾਲੇ ਦਾ ਮੰਨਣਾ ਹੈ ਕਿ BSE ਦੇ ਮਿਉਚੁਅਲ ਫੰਡ ਡਿਸਟ੍ਰੀਬਿਊਸ਼ਨ ਪਲੇਟਫਾਰਮ ਨਾਲ ਸਾਂਝ ਬਣਾਉਣ ਨਾਲ ਨਿਵੇਸ਼ ਦੇ ਮੌਕੇ ਆਮ ਨਾਗਰਿਕਾਂ ਲਈ ਹੋਰ ਆਸਾਨ ਅਤੇ ਪਹੁੰਚਯੋਗ ਬਣਣਗੇ। ਇਸ ਨਾਲ ਵਿੱਤੀ ਬਾਜ਼ਾਰਾਂ ਵਿੱਚ ਆਮ ਲੋਕਾਂ ਦੀ ਭਾਗੀਦਾਰੀ ਵਧੇਗੀ ਅਤੇ ਡਾਕ ਵਿਭਾਗ ਦੀ ਭੂਮਿਕਾ ਇੱਕ ਭਰੋਸੇਯੋਗ ਵਿੱਤੀ ਸੇਵਾ ਪ੍ਰਦਾਤਾ ਵਜੋਂ ਮਜ਼ਬੂਤ ਹੋਵੇਗੀ।
ਜਾਣਕਾਰੀ ਮੁਤਾਬਕ, ਇਹ ਸਮਝੌਤਾ ਤਿੰਨ ਸਾਲਾਂ ਲਈ ਲਾਗੂ ਰਹੇਗਾ ਅਤੇ ਭਵਿੱਖ ਵਿੱਚ ਲੋੜ ਅਨੁਸਾਰ ਇਸਨੂੰ ਅੱਗੇ ਵਧਾਇਆ ਵੀ ਜਾ ਸਕਦਾ ਹੈ।
Postmen Will Become Mutual Fund Distributors MOU Signed
