April 17, 2025
ਚੰਡੀਗੜ੍ਹ, 17 ਅਪ੍ਰੈਲ 2025: ਬੁੱਧਵਾਰ ਨੂੰ ਅਰੁਣ ਜੇਤਲੀ ਸਟੇਡੀਅਮ 'ਚ ਖੇਡੇ ਆਈਪੀਐਲ 2025 ਦੇ ਮੈਚ 'ਚ ਦਿੱਲੀ ਕੈਪੀਟਲਜ਼ ਨੇ ਰਾਜਸਥਾਨ ਰਾਇਲਜ਼ ਨੂੰ ਸੁਪਰ ਓਵਰ 'ਚ ਹਰਾਇਆ। ਰਾਜਸਥਾਨ ਨੇ ਸੁਪਰ ਓਵਰ 'ਚ 11 ਦੌੜਾਂ ਬਣਾਈਆਂ ਸਨ, ਪਰ ਦਿੱਲੀ ਨੇ ਸਿਰਫ਼ ਚਾਰ ਗੇਂਦਾਂ ਬਾਕੀ ਰਹਿੰਦਿਆਂ ਮੈਚ ਜਿੱਤ ਲਿਆ।
ਸੁਪਰ ਓਵਰ 'ਚ ਦਿੱਲੀ ਲਈ ਕੇਐਲ ਰਾਹੁਲ ਅਤੇ ਟ੍ਰਿਸਟਨ ਸਟੱਬਸ ਆਏ ਅਤੇ ਸਟੱਬਸ ਨੇ ਛੱਕਾ ਲਗਾ ਕੇ ਦਿੱਲੀ ਨੂੰ ਜਿੱਤ ਦਿਵਾਈ। 2022 ਤੋਂ ਬਾਅਦ ਇਹ ਪਹਿਲਾ ਮੌਕਾ ਹੈ ਜਦੋਂ ਕਿਸੇ ਆਈਪੀਐਲ ਮੈਚ ਦਾ ਨਤੀਜਾ ਸੁਪਰ ਓਵਰ ਤੱਕ ਗਿਆ ਹੈ। ਇਸ ਜਿੱਤ ਨਾਲ ਦਿੱਲੀ ਦੀ ਟੀਮ ਅੰਕ ਸੂਚੀ ਵਿੱਚ ਸਿਖਰ 'ਤੇ ਪਹੁੰਚ ਗਈ। ਉਨ੍ਹਾਂ ਦੇ ਛੇ ਮੈਚਾਂ 'ਚ ਪੰਜ ਜਿੱਤਾਂ ਅਤੇ ਇੱਕ ਹਾਰ ਨਾਲ 10 ਅੰਕ ਹਨ।
ਹੁਣ ਤੱਕ ਆਈਪੀਐਲ ਵਿੱਚ 15 ਮੈਚ ਟਾਈ ਹੋਏ ਹਨ। ਦਿੱਲੀ ਦਾ ਸੁਪਰ ਓਵਰਾਂ 'ਚ ਰਿਕਾਰਡ ਚੰਗਾ ਹੈ, ਦਿੱਲੀ ਨੇ ਪੰਜ 'ਚੋਂ ਚਾਰ ਮੈਚ ਜਿੱਤੇ ਹਨ। ਦਿੱਲੀ ਨੇ 2021 'ਚ ਸਨਰਾਈਜ਼ਰਜ਼ ਹੈਦਰਾਬਾਦ, 2020 ਵਿੱਚ ਪੰਜਾਬ ਕਿੰਗਜ਼, 2019 ਵਿੱਚ ਕੋਲਕਾਤਾ ਨਾਈਟ ਰਾਈਡਰਜ਼ ਅਤੇ 2013 'ਚ ਰਾਇਲ ਚੈਲੇਂਜਰਜ਼ ਬੰਗਲੌਰ (ਆਰਸੀਬੀ) ਨੂੰ ਹਰਾਇਆ ਸੀ ਅਤੇ ਫਿਰ ਰਾਜਸਥਾਨ ਨੂੰ ਸੁਪਰ ਓਵਰ 'ਚ ਹਰਾਇਆ ਸੀ।
'ਦਿੱਲੀ ਦੀ ਟੀਮ ਆਈਪੀਐਲ 'ਚ ਸਭ ਤੋਂ ਵੱਧ ਸੁਪਰ ਓਵਰ ਮੈਚ ਜਿੱਤਣ ਵਾਲੀ ਟੀਮ ਬਣ ਗਈ ਹੈ। ਇਸ ਮਾਮਲੇ 'ਚ, ਦਿੱਲੀ ਨੇ ਪੰਜਾਬ ਕਿੰਗਜ਼ ਨੂੰ ਪਿੱਛੇ ਛੱਡ ਦਿੱਤਾ, ਜਿਸਨੇ ਚਾਰ ਮੈਚਾਂ ਵਿੱਚ ਤਿੰਨ ਵਾਰ ਸਫਲਤਾ ਹਾਸਲ ਕੀਤੀ ਹੈ।
ਇਸ ਤੋਂ ਪਹਿਲਾਂ, ਟੀਚੇ ਦਾ ਪਿੱਛਾ ਕਰਦੇ ਹੋਏ, ਰਾਜਸਥਾਨ ਦੀ ਸ਼ੁਰੂਆਤ ਚੰਗੀ ਸੀ ਅਤੇ ਪਾਵਰਪਲੇ ਤੱਕ ਕੋਈ ਵਿਕਟ ਨਹੀਂ ਗਵਾਇਆ। ਹਾਲਾਂਕਿ, ਕਪਤਾਨ ਸੰਜੂ ਸੈਮਸਨ 19 ਗੇਂਦਾਂ 'ਤੇ 31 ਦੌੜਾਂ ਬਣਾਉਣ ਤੋਂ ਬਾਅਦ ਰਿਟਾਇਰਡ ਹਰਟ ਹੋ ਗਿਆ ਅਤੇ ਦੁਬਾਰਾ ਮੈਦਾਨ 'ਤੇ ਨਹੀਂ ਪਰਤਿਆ।
ਰਿਆਨ ਪਰਾਗ ਅੱਠ ਦੌੜਾਂ ਬਣਾ ਕੇ ਪੈਵੇਲੀਅਨ ਪਰਤ ਗਿਆ। ਇਸ ਤੋਂ ਬਾਅਦ ਯਸ਼ਸਵੀ ਨੇ ਨਿਤੀਸ਼ ਰਾਣਾ ਨਾਲ ਮਿਲ ਕੇ 50+ ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਯਸ਼ਸਵੀ ਨੇ ਸੀਜ਼ਨ ਦਾ ਆਪਣਾ ਦੂਜਾ ਅਰਧ ਸੈਂਕੜਾ ਲਗਾਇਆ ਪਰ ਉਹ 37 ਗੇਂਦਾਂ ਵਿੱਚ ਤਿੰਨ ਚੌਕਿਆਂ ਅਤੇ ਚਾਰ ਛੱਕਿਆਂ ਦੀ ਮਦਦ ਨਾਲ 51 ਦੌੜਾਂ ਬਣਾ ਕੇ ਆਊਟ ਹੋ ਗਿਆ।
ਇਸ ਤੋਂ ਬਾਅਦ, ਨਿਤੀਸ਼ ਰਾਣਾ ਨੇ ਜ਼ਿੰਮੇਵਾਰੀ ਸੰਭਾਲੀ ਅਤੇ 26 ਗੇਂਦਾਂ ਵਿੱਚ ਆਪਣਾ ਅਰਧ ਸੈਂਕੜਾ ਪੂਰਾ ਕੀਤਾ। ਨਿਤੀਸ਼ ਵੀ ਜ਼ਿਆਦਾ ਦੇਰ ਟਿਕ ਨਹੀਂ ਸਕਿਆ ਅਤੇ 28 ਗੇਂਦਾਂ ਵਿੱਚ ਛੇ ਚੌਕਿਆਂ ਅਤੇ ਦੋ ਛੱਕਿਆਂ ਦੀ ਮਦਦ ਨਾਲ 51 ਦੌੜਾਂ ਬਣਾ ਕੇ ਆਊਟ ਹੋ ਗਿਆ।
Read More: DC ਬਨਾਮ RR: ਦਿੱਲੀ ਕੈਪੀਟਲਜ਼ ਨੇ ਰਾਜਸਥਾਨ ਸਾਹਮਣੇ ਰੱਖਿਆ 189 ਦੌੜਾਂ ਦਾ ਟੀਚਾ
DC Vs RR Delhi Capitals Beat Rajasthan Royals In Super Over
