November 22, 2024
Admin / Punjab
ਲਾਈਵ ਪੰਜਾਬੀ ਟੀਵੀ ਬਿਊਰੋ : ਜਲੰਧਰ ਦੇ ਥਾਣਾ 3 ਅਧੀਨ ਪੈਂਦੇ ਲਾਲ ਬਾਜ਼ਾਰ 'ਚ ਸਥਿਤ ਸ਼੍ਰੀ ਗਣੇਸ਼ ਜਵੈਲਰ ਦੀ ਦੁਕਾਨ 'ਚ ਦੇਰ ਰਾਤ ਚੋਰੀ ਹੋਣ ਦੀ ਘਟਨਾ ਸਾਹਮਣੇ ਆਈ ਹੈ। ਦਰਅਸਲ, ਦੋਸ਼ੀ ਗੂੰਗਾ ਬਣ ਕੇ ਦੁਕਾਨ ਵਿਚ ਬ੍ਰੇਸਲੇਟ ਖਰੀਦਣ ਦੇ ਬਹਾਨੇ ਆਇਆ ਸੀ। ਇਸ ਦੌਰਾਨ ਮੁਲਜ਼ਮ ਨੇ ਦੁਕਾਨਦਾਰ ਨੂੰ ਚਕਮਾ ਦੇ ਕੇ ਬ੍ਰੇਸਲੇਟ ਆਪਣੀ ਜੇਬ ਵਿੱਚ ਲੁਕਾ ਲਿਆ ਅਤੇ ਕੋਈ ਬਹਾਨਾ ਬਣਾ ਕੇ ਉਥੋਂ ਫਰਾਰ ਹੋ ਗਿਆ।
ਸ਼ਹੀਦ ਬਾਬੂ ਲਾਭ ਸਿੰਘ ਨਗਰ ਦੇ ਵਸਨੀਕ ਕੁਨਾਲ ਨੇ ਦੱਸਿਆ ਕਿ ਉਸ ਦੀ ਲਾਲ ਬਾਜ਼ਾਰ ਵਿਚ ਸ਼੍ਰੀ ਗਣੇਸ਼ ਜਵੈਲਰ ਦੇ ਨਾਂ ’ਤੇ ਦੁਕਾਨ ਹੈ। ਉਹ ਰਾਤ ਕਰੀਬ 8.30 ਵਜੇ ਦੁਕਾਨ 'ਤੇ ਬੈਠਾ ਸੀ। ਉਸੇ ਸਮੇਂ ਇਕ ਨੌਜਵਾਨ ਖਰੀਦਦਾਰੀ ਲਈ ਆਇਆ। ਨੌਜਵਾਨ ਨੇ ਇਸ਼ਾਰਾ ਕਰਕੇ ਬ੍ਰੇਸਲੇਟ ਖਰੀਦਣ ਦੀ ਗੱਲ ਕੀਤੀ। ਜਿਸ ਤੋਂ ਬਾਅਦ ਉਸ ਨੇ ਲਾਕਰ 'ਚੋਂ ਚਾਂਦੀ ਦਾ ਬ੍ਰੇਸਲੇਟ ਕੱਢ ਕੇ ਤੋਲ ਕੇ ਡੱਬਾ ਉਸ ਦੇ ਸਾਹਮਣੇ ਖੋਲ੍ਹ ਦਿੱਤਾ। ਇਸ ਦੌਰਾਨ ਨੌਜਵਾਨ ਇਸ਼ਾਰਿਆਂ ਰਾਹੀਂ ਉਸ ਤੋਂ ਹਰ ਬ੍ਰੇਸਲੇਟ ਦੀ ਕੀਮਤ ਪੁੱਛ ਰਿਹਾ ਸੀ।
ਉਸੇ ਸਮੇਂ ਇੱਕ ਮਹਿਲਾ ਗਾਹਕ ਦੁਕਾਨ ਵਿਚ ਦਾਖਲ ਹੋਈ। ਜਦੋਂ ਉਹ ਉਸ ਨਾਲ ਗੱਲ ਕਰਨ ਲੱਗਾ ਤਾਂ ਉਸ ਨੇ ਇਸ ਦਾ ਫਾਇਦਾ ਉਠਾਉਂਦੇ ਹੋਏ ਬ੍ਰੇਸਲੇਟ ਆਪਣੀ ਜੇਬ ਵਿਚ ਪਾ ਲਿਆ ਅਤੇ ਫਿਰ ਉਸ ਤੋਂ ਕੁਝ ਹੋਰ ਮੰਗਣਾ ਸ਼ੁਰੂ ਕਰ ਦਿੱਤਾ। ਇਸ ਦੌਰਾਨ ਉਕਤ ਨੌਜਵਾਨ ਉਨ੍ਹਾਂ ਨੂੰ ਇਸ਼ਾਰਾ ਕਰਦਾ ਹੋਇਆ ਬਾਹਰ ਨਿਕਲਿਆ ਕਿ ਉਹ ਕਿਸੇ ਨੂੰ ਆਪਣੇ ਨਾਲ ਲੈ ਕੇ ਬਾਅਦ ਵਿਚ ਦੁਕਾਨ 'ਤੇ ਆ ਆਵੇਗਾ।
ਘਟਨਾ ਸੀਸੀਟੀਵੀ ਵਿਚ ਕੈਦ
ਇਸ ਤੋਂ ਬਾਅਦ ਜਦੋਂ ਕੁਣਾਲ ਨੇ ਡੱਬੇ ਨੂੰ ਦੁਬਾਰਾ ਤੋਲਿਆ ਤਾਂ ਉਸ 'ਚ 100 ਗ੍ਰਾਮ ਚਾਂਦੀ ਘੱਟ ਸੀ। ਜਦੋਂ ਉਹ ਬਾਹਰ ਆਇਆ ਤਾਂ ਨੌਜਵਾਨ ਫ਼ਰਾਰ ਹੋ ਚੁੱਕਾ ਸੀ। ਜਦੋਂ ਸੀਸੀਟੀਵੀ ਚੈੱਕ ਕੀਤਾ ਗਿਆ ਤਾਂ ਨੌਜਵਾਨ ਆਪਣੀ ਜੇਬ ਵਿੱਚ ਬ੍ਰੇਸਲੇਟ ਪਾਉਂਦਾ ਦੇਖਿਆ ਗਿਆ।
Theft In Jalandhar s Shri Ganesh Jewellers Shop
